హోర్ముజ్‌పై ఇరాన్ పట్టుకు ఎదురుదెబ్బ.. చమురు ఎగుమతులు కుదేలు.
కొనసాగుతున్న పోరు..దౌత్యపరమైన పురోగతికి బ్రేక్.
హౌతీల దాడులతో మరింత ఉద్రిక్తత.. $100 దాటిన బ్రెంట్ క్రూడ్..
అమెరికా–ఇరాన్ మధ్య కొనసాగుతున్న యుద్ధంలో అమెరికా కొంతమేర వ్యూహాత్మక విజయాన్ని సాధించినప్పటికీ, ఈ పోరుకు త్వరలో ముగింపు కనిపించడం లేదు. హోర్ముజ్ జలసంధిపై ఇరాన్ ప్రభావాన్ని తగ్గించడంతో పాటు, ఇరాన్ చమురు ఎగుమతులను తీవ్రంగా దెబ్బతీయడంలో అమెరికా చర్యలు ప్రభావం చూపుతున్నాయి.
దీంతో ఇరాన్ ఆర్థిక వ్యవస్థపై ఒత్తిడి మరింత పెరిగింది…ఫిబ్రవరిలో స్వల్పకాలిక యుద్ధంగా భావించిన అమెరికా–ఇజ్రాయెల్ సైనిక చర్యలు నెలలుగా కొనసాగుతున్నాయి. జూన్‌లో కుదిరిన కాల్పుల విరమణ ఒప్పందం కూడా ఎక్కువకాలం నిలవలేదు. ప్రస్తుతం స్వల్పస్థాయి పోరాటం కొనసాగుతుండగా, శాశ్వత శాంతి ఒప్పందానికి సంబంధించి స్పష్టమైన పురోగతి కనిపించడం లేదు..
వెనక్కి తగ్గని ఇరాన్.
ఆర్థిక ఒత్తిడి పెరుగుతున్నప్పటికీ ఇరాన్ నాయకత్వం వెనక్కి తగ్గే సంకేతాలు ఇవ్వడం లేదు. ఒత్తిడి మరింత పెరిగితే లొంగిపోవడం కంటే సైనిక ప్రతిస్పందనను తీవ్రతరం చేసే అవకాశం ఉందని విశ్లేషకులు అంచనా వేస్తున్నారు.
ఇదే సమయంలో యెమెన్‌లోని ఇరాన్ అనుకూల హౌతీలు సౌదీ అరేబియాపై దాడులను తీవ్రతరం చేయడం పరిస్థితిని మరింత సంక్లిష్టంగా మార్చింది. సౌదీ ఇంధన మౌలిక వసతులు, రవాణా మార్గాలపై దాడులు జరగడంతో ప్రాంతీయ చమురు సరఫరాపై ఆందోళనలు పెరిగాయి..
$100 దాటిన చమురు ధర.
మధ్యప్రాచ్యంలో ఉద్రిక్తతల ప్రభావం అంతర్జాతీయ చమురు మార్కెట్‌పై స్పష్టంగా కనిపిస్తోంది. బ్రెంట్ క్రూడ్ ధర ఈ వారం బ్యారెల్‌కు $100ను దాటి $107 స్థాయికి చేరింది. అమెరికా WTI కూడా $100 మార్క్‌ను దాటింది. హోర్ముజ్, ఎర్ర సముద్ర మార్గాల్లో సరఫరా అంతరాయాల భయాలు ధరల పెరుగుదలకు ప్రధాన కారణంగా మారాయి.
ముగింపు లేని యుద్ధమా?.
ప్రస్తుత పరిస్థితులను చూస్తే ఇరాన్ పూర్తిగా వెనక్కి తగ్గే పరిస్థితి కనిపించడం లేదు. మరోవైపు అమెరికాకు కూడా స్పష్టమైన నిష్క్రమణ వ్యూహం కనిపించడం లేదని విశ్లేషకులు చెబుతున్నారు.
దీంతో ఈ యుద్ధం మరింత కాలం కొనసాగి.. ఇరుపక్షాలకూ భారీ ఆర్థిక, సైనిక నష్టాలను మిగిల్చే అవకాశం ఉంది. స్పష్టమైన విజేత లేకుండానే ఈ ప్రతిష్టంభన కొనసాగుతుందా అన్నదే ఇప్పుడు ప్రధాన ప్రశ్నగా మారింది.
