కొత్త రకం సైబర్ నేరం ఎయిర్‌టెల్ కస్టమర్లు బెంబేలెత్తిపోతున్నారు..!

కొత్త రకం సైబర్ నేరం ఒకటి ఇప్పుడు పోలీసులను కంటి మీద కునుకు లేకుండా చేస్తుంది. ఈ నేరం చూసి ముఖ్యంగా ఎయిర్‌టెల్ కస్టమర్లు బెంబేలెత్తిపోతున్నారు. ఎయిర్‌టెల్ కస్టమర్లను టార్గెట్‌గా చేసుకొని సైబర్ నేరగాళ్లు రెచ్చిపోతున్నారు. కొత్త రకంగా జరుగుతున్న ఈ నేరంపై ఎయిర్‌టెల్ కస్టమర్లు జాగ్రత్తగా ఉండాలని సైబర్ క్రైమ్ పోలీసులు సూచిస్తున్నారు. అయితే ఈ తరహా జరుగుతున్న నేరాలను పసిగట్టి చర్యలు తీసుకునేలోపే రూ. వందల కోట్ల రూపాయలను సైబర్ నేరగాళ్లు కొట్టేశారు. అసలు దీని వెనకాల ఏం జరుగుతుంది? పూర్తి వివరాలివీ..
ఎయిర్‌టెల్ కస్టమర్లకు అర్ధరాత్రి సమయంలో ఒక మెసేజ్ వస్తుంది. దీనిలో మీ నెంబరు మరికాసేపట్లో బ్లాక్ అవుతుందని, అది కాకుండా ఉండాలంటే వెంటనే తాము ఇచ్చిన నెంబర్‌కు కాల్ చేయాలని సమాచారం వస్తుంది. దీన్ని చూసి వెంటనే హైరానా పడుతున్న ఎయిర్‌టెల్ కస్టమర్లు సదరు మెసేజ్‌లో ఉన్న నంబర్లకు కాల్ చేస్తున్నారు. కాల్ చేసిన వెంటనే అవతలి నుంచి సైబర్ నేరగాళ్లు ఫోన్ లిఫ్ట్ చేస్తారు. ఆ తర్వాత ఎనీ డెస్క్ అనే యాప్‌ని కస్టమర్ల ద్వారా డౌన్‌లోడ్ చేయిస్తున్నారు. ఎనీ ఈ డెస్క్‌లో ఆధార్, పాన్ కార్డ్ నెంబర్, బ్యాంక్ డీటెయిల్స్ అన్నీ కూడా కస్టమర్ దగ్గర్నుంచి టైప్ చేయిస్తారు. ఎనీ డెస్క్‌లో వచ్చే సమాచారాన్ని అవతల సైబర్ నేరగాళ్లు పూర్తిగా రికార్డ్ చేసుకుంటారు.
పది నిమిషాలు చాటింగ్ చేసిన తర్వాత మీ ఫోను బ్లాక్ కాదని, తాము అడిగిన వివరాలను ఇచ్చారు.. కాబట్టి మీ నెంబర్ యథాతథంగా కొనసాగుతుందని ఫోన్ కట్ చేస్తారు. ఇలా కట్ చేసిన పది నిమిషాలకి ఎయిర్‌టెల్ కస్టమర్ ఇచ్చిన బ్యాంకు డీటెయిల్స్‌తో పాటుగా పిన్‌లతో కస్టమర్లు సంబంధించిన అకౌంట్ నుంచి లక్షల రూపాయలు కొట్టేస్తున్నారు. ఇప్పటి వరకు దేశవ్యాప్తంగా ఆన్‌లైన్ ఎయిర్‌టెల్ ట్రెండింగ్ క్రైమ్ ఇప్పుడు జోరుగా కొనసాగుతుందని దీనిపట్ల ఎయిర్‌టెల్ కస్టమర్లు పూర్తిగా అప్రమత్తంగా ఉండాలని అధికారులు చెబుతున్నారు. అమెరికాలో ఉన్న ఒక ఎయిర్‌టెల్ కస్టమర్ దగ్గర నుంచి దాదాపు రూ.12 లక్షల నగదును సైబర్ నేరగాళ్లు కొట్టేశారు. హైదరాబాద్, సైబరాబాద్, రాచకొండ పరిధిలోనూ ప్రతి రోజు పదుల సంఖ్యలో ఎయిర్‌టెల్ కస్టమర్ నుంచి ఫిర్యాదులు అందుతున్నాయి. అయితే అన్ వాంటెడ్‌గా వస్తున్న మెసేజ్‌లకు ఎప్పుడు కూడా స్పందించవద్దని అధికారులు సూచిస్తున్నారు.