‘చిరంజీవి ఆయనకి ఆయనే సాటి. ఆయన అద్వితీయమైన నటన, విభిన్నమైన పాత్రలు, అద్భుతమైన వ్యక్తిత్వం. ప్రధానమంత్రి నరేంద్ర మోదీ ట్వీట్‌

ప్రతిష్టాత్మక ఇండియన్ ఫిలిం పర్సనాలిటీ ఆఫ్ ద ఇయర్-2022 అవార్డును దక్కించుకున్న దిగ్గజ నటుడు, మెగాస్టార్ చిరంజీవిని ప్రధానమంత్రి నరేంద్ర మోదీ అభినందించారు. ఈ మేరకు ఆయన ట్విట్టర్ ద్వారా అభినందనలు తెలిపారు. చిరంజీవికి అభినందనలు తెలుపుతూ నిన్న కేంద్ర సమాచార, ప్రసారాల శాఖ మంత్రి అనురాగ్ ఠాకూర్ ట్వీట్ చేశారు. ఆ ట్వీట్‌ను రీట్వీట్ చేస్తూ ప్రధాని మోదీ అభినందనలు తెలియజేశారు.

‘‘చిరంజీవి ఆయనకి ఆయనే సాటి. ఆయన అద్వితీయమైన నటన, విభిన్నమైన పాత్రలు, అద్భుతమైన వ్యక్తిత్వం కొన్ని తరాల సినీ ప్రేమికులకు ఆయన్ని దగ్గర చేశాయి. ఇంటర్నేషనల్ ఫిలిం ఫెస్టివల్ ఆఫ్ ఇండియా, గోవాలో ఇండియన్ ఫిలిం పర్సనాలిటీ ఆఫ్ ద ఇయర్ అవార్డు దక్కించుకున్న ఆయనకి అభినందనలు’’ అని ప్రధాని మోదీ ట్వీట్‌లో పేర్కొన్నారు. అలాగే, తెలుగులోనూ మోదీ ట్వీట్ చేశారు. ‘‘చిరంజీవి గారు విలక్షణమైన నటుడు. అద్భుతమైన వ్యక్తిత్వంతో, విభిన్న నటనాచాతుర్యంతో అనేక పాత్రలు పోషించి కొన్ని తరాల ప్రేక్షకుల అభిమానాన్నీ, ఆదరణనూ చూరగొన్నారు’’ అని తెలుగులో మోదీ ట్వీట్ చేశారు.

మోదీ ట్వీట్‌కి మెగాస్టార్ చిరంజీవి స్పందించారు. ‘‘గౌరవనీయులైన ప్రధాన మంత్రి శ్రీ నరేంద్ర మోదీ, దీన్ని గొప్ప గౌరవంగా భావిస్తున్నాను. మీ గొప్ప మాటలకు నా ధన్యవాదాలు’’ అని చిరంజీవి పేర్కొన్నారు.

గోవాలో రెండు రోజులపాటు జరుగుతున్న ఇంటర్నేషనల్ ఫిలిం ఫెస్టివల్ ఆఫ్ ఇండియా ఉత్సవాల్లో చిరంజీవికి ఇండియన్ ఫిలిం పర్సనాలిటీ ఆఫ్ ద ఇయర్ అవార్డును కేంద్ర మంత్రి అనురాగ్ ఠాకూర్ ప్రకటించారు. చిరంజీవి అభినందనలు తెలుపుతూ ఆయన ట్వీట్ కూడా చేశారు. ఆ తరవాత సమాచార, ప్రసారా శాఖ కూడా ఒక గ్రాఫికల్ ఇమేజ్‌ను ట్వీట్ చేసింది. అదే ఇప్పుడు సోషల్ మీడియాలో వైరల్ అవుతోంది. ఈ ఇమేజ్‌ను ట్వీట్ చేస్తూ చిరంజీవికి అభినందనలు తెలుపుతున్నారు.

ఇండియన్ సినిమా 100 సంవత్సరాలు పూర్తిచేసుకున్న సందర్భంగా 2013 నుంచి ఈ అవార్డును ప్రదానం చేస్తు్న్నారు. ఇప్పటి వరకు తెలుగు సినీ పరిశ్రమ నుంచి ఎస్పీ బాలసుబ్రహ్మణ్యం మాత్రమే ఈ అవార్డును దక్కించుకున్నారు. ఇప్పుడు ఆయన సరసన చిరంజీవి కూడా చేరారు. వీరితో పాటు వహీదా రెహమాన్, రజినీకాంత్, ఇళయరాజా, అమితాబ్ బచ్చన్, సలీమ్ ఖాన్, బిశ్వజిత్ ఛటర్జీ, హేమమాలిని, ప్రసూన్ జోషి కూడా ఈ అవార్డును గతంలో అందుకున్నారు. ఈ పురస్కార గ్రహీతకు నెమలి బొమ్మతో ఉన్న రజత పతకం, రూ.10 లక్షల నగదు, ధ్రువీకరణ పత్రం అందజేస్తారు.