ఢిల్లీ లిక్కర్ స్కామ్‌లో క్విడ్ ప్రొ కో..!…CBI రిమాండ్ రిపోర్టులో కీలక విషయాలు..

ఢిల్లీ లిక్కర్ స్కామ్‌లో క్విడ్ ప్రొ కో విధానం అమలైనట్లు సీబీఐ అనుమానిస్తున్నది.

ఆ రాష్ట్ర ఎక్సయిజ్ పాలసీని అనుకూలంగా రూపొందించేలా తెలంగాణ వ్యాపారవేత్తల ఒత్తిడి ఉన్నట్లు భావిస్తున్నది.

ముడుపులు ఢిల్లీకి.. లైసెన్సులు ముట్టచెప్పినవారికి తరహాలో డబ్బు చేతులు మారినట్లు ఆరోపిస్తున్నది. ఈ విషయంలో ఇప్పటికే కొన్ని ఆధారాలను సేకరించింది. వాటి వెలుగులో అభియోగాలను ఎస్టాబ్లిష్ చేయడానికి సీబీఐ విశ్వ ప్రయత్నాలు చేస్తున్నది. ఈ కేసులో సంబంధం ఉందన్న అనుమానంతో బోయిన్‌పల్లి అభిషేక్‌రావును ప్రశ్నించిన సీబీఐ టీమ్ సోమవారం ఢిల్లీలోని కోర్టుకు సమర్పించిన అఫిడవిట్‌లో క్విడ్ ప్రొ కో అంశాన్ని పరోక్షంగా ప్రస్తావించింది. హవాలా మార్గంలో డబ్బులు చేతులు మారినట్లు రిపోర్టులో పేర్కొన్నది.

ఢిల్లీ ఎక్సయిజ్ పాలసీని ఫేవర్‌గా మల్చుకోవడం ద్వారా లైసెన్సులు పొందడానికి తెలంగాణ నుంచి పావులు కదిపినట్లు ప్రస్తావించింది. ఇలాంటి సాయం చేసినందుకు ఢిల్లీ పెద్దలు వీరి నుంచి ముడుపు అందుకున్నట్లు వ్యాఖ్యానించింది. ఢిల్లీ లిక్కర్ స్కామ్‌లో, ఆ రాష్ట్ర ఎక్సయిజ్ పాలసీలో తెలంగాణకు చెందిన రాజకీయవేత్తల, వ్యాపారవేత్తల ప్రమేయం ఏ రూపాల్లో, ఏ స్థాయిలో ఉన్నదో సీబీఐ లోతుగా దర్యాప్తు చేస్తూ ఉన్నది. లెక్కల్లోకి రాని కోట్లాది రూపాయల డబ్బులు చేతులు మారినట్లు అనుమానించి మనీ లాండరింగ్ కోణం నుంచి దర్యాప్తు జరిపి సహకారం ఇవ్వాల్సిందిగా ఈడీ (ఎన్‌ఫోర్స్ మెంట్ డైరెక్టరేట్)ను కోరింది. అందులో భాగంగా హైదరాబాద్ నగరంతో పాటు రాష్ట్రంలోని మరికొన్ని జిల్లాల్లో ఈడీ సోదాలు జరిగాయి. కొన్ని డాక్యుమెంట్లను ఆధారాలను సేకరించింది.

వివరాలను మర్చిపోయానంటున్న అభిషేక్..
లిక్కర్ స్కామ్‌లో సీబీఐ మొత్తం 15 మందిని నిందితులుగా పేర్కొంటూ ఎఫ్ఐఆర్ నమోదు చేసింది. దర్యాప్తు క్రమంలో ఐదవ నిందితుడైన విజయ్ నాయర్, 8వ నిందితుడైన సమీర్ మహేంద్రు, 11వ నిందితుడైన దినేష్ అరోరా, 14వ నిందితుడైన అరుణ్ రామచంద్రన్ పిళ్ళై, 15వ నిందితుడైన అర్జున్ పాండే తదితరులను సీబీఐ, ఈడీ అధికారులు ప్రశ్నించారు. అందులో భాగంగానే ఎఫ్ఐఆర్‌లో పేరు లేకపోయినా వారి నుంచి రాబట్టిన వివరాల మేరకు బోయిన్‌పల్లి అభిషేక్‌రావును సీబీఐ ప్రశ్నించింది. విచారణకు రావాల్సిందిగా ఇచ్చిన నోటీసుల మేరకు గత నెల 25, 28, 29 తేదీలతో పాటు ఈ నెల 3, 6 తేదీల్లో కూడా హాజరైనట్లు సీబీఐ తన రిమాండ్ రిపోర్టులో పేర్కొన్నది. స్కామ్‌లో అభిషేక్ పాత్ర ఉన్నట్లు నిర్ధారణ అయిందని కూడా స్పష్టం చేసింది..మరింత లోతుగా ప్రశ్నించాల్సిన అవసరం ఉందన్న ఉద్దేశంతోనే క్రిమినల్ ప్రొసీజర్ కోడ్‌లోని సెక్షన్ 41(ఏ) ప్రకారం నోటీసులు జారీ చేసి విచారణకు హాజరుకావాల్సిందిగా మళ్లీ ఆదేశించినట్లు సీబీఐ పేర్కొన్నది. ఆ ప్రకారం ఈ నెల 7, 8, 9 తేదీల్లో ప్రశ్నించామని, తమ దగ్గర ఉన్న కొన్ని సాక్ష్యాలు, ఆధారాలను చూపించి వాటిపై వివరాలు అందించాల్సిందిగా నిలదీశామని సీబీఐ ఆ రిపోర్టులో వెల్లడించింది. కానీ ఆ విషయాలను మర్చిపోయానని, వాటిని గుర్తుచేసుకోడానికి తగిన సమయం ఇవ్వాల్సిందిగా రిక్వెస్టు చేశారని, తగిన సమయాన్ని ఇచ్చామని, అయినా విచారణలో తమకు సహకరించలేదని పేర్కొన్నది. ఉద్దేశపూర్వకంగానే వాస్తవాలను తొక్కిపెడుతున్నారని, ఆ కారణంగానే తమకు సహకరించడంలేదని కోర్టు దృష్టికి తీసుకెళ్ళింది.

అభిషేక్ ద్వారానే ముడుపుల బదిలీ..
ఇండో స్పిరిట్స్ ఎండీ సమీర్ మహేంద్రు ద్వారా బదిలీ అయిన డబ్బులు అభిషేక్ బ్యాంకు ఖాతాలోకి వచ్చాయని, వీటి గురించి ఎంత ప్రశ్నించినా సంతృప్తికరమైన సమాధానం ఇవ్వలేదన్నది సీబీఐ ఆరోపణ. అభిషేక్ అకౌంట్‌లోకి వచ్చిన డబ్బును హవాలా మార్గంలో దినేష్ అరోరా ద్వారా విజయ్ నాయర్‌కు చేరిందని సీబీఐ పేర్కొన్నది. ఈ వ్యవహారం మొత్తం లిక్కర్ పాలసీ అమలులోకి రావడానికి ముందే 2021 నవంబరు నుంచి ఈ ఏడాది జూలై మధ్యలో జరిగిందని పేర్కొన్నది. హైదరాబాద్, ముంబై, ఢిల్లీ నగరాల్లో పలుమార్లు వీరి మధ్య సమావేశాలు జరిగాయని పేర్కొన్నది. ఈ మీటింగుల్లో లిక్కర్ వ్యాపారులు కూడా పాలు పంచుకున్నారని, ముడుపు ఇవ్వడం ద్వారా వైన్ షాపులకు, డిస్టిల్లరీలకు అనుమతి మంజూరు అయిందని ఆరోపించింది…ఎక్సయిజ్ పాలసీ వీరికి అనుకూలంగా మారేందుకే హవాలా మార్గంలో నగదు చేతులు మారిందని పేర్కొన్నది. పరోక్షంగా క్విడ్ ప్రొ కో విధానం అమలైందన్న తీరులో రిమాండ్ రిపోర్టులో సీబీఐ వ్యాఖ్యానాలు చేసింది. 2021-22 సంవత్సరానికి సంబంధించిన ఢిల్లీ లిక్కర్ పాలసీలో ఒకరికొకరు పరస్పర సహకారం ఉండేలా లిక్కర్ వ్యాపారులు, రాష్ట్ర ఎక్సయిజ్ శాఖకు మధ్య ఈ లావాదేవీలు, సమావేశాలు జరిగాయని, చివరకు కేంద్ర హోంశాఖకు చెందిన డైరెక్టర్ ప్రవీణ్ రాయ్ నుంచి అందిన ఫిర్యాదు మేరకు సీబీఐ దర్యాప్తు అనివార్యమైందిన, లెఫ్టినెంట్ గవర్నర్ జోక్యం చేసుకోవాల్సి వచ్చిందని ఆ రిమాండ్ రిపోర్టులో సీబీఐ పేర్కొన్నది…అభిషేక్‌రావ్ పాత్ర ఉన్నట్లు నిర్ధారణ అయినప్పటికీ అనేక ఆధారాలను చూపించి వివరాలను రాబట్టాలనుకున్నా పెదవి విప్పకపోవడంతో ఇప్పుడు పోలీసు కస్టడీకి తీసుకోవాల్సిన అవసరం ఏర్పడిందని సీబీఐ వ్యాఖ్యానించింది. ఈ స్కామ్‌ భారీ స్థాయిలోనే ఉన్నదని, సాక్షులతో పాటు ఎఫ్ఐర్‌లోని నిందితుల నుంచి రాబట్టిన వివరాల మేరకు డబ్బు చేతులు మారిన వ్యవహారం తేటతెల్లమైందని పేర్కొన్నది. ఎవరెవరి పాత్ర ఏ స్థాయిలో ఉన్నది?.. ముడపుల వెనక ఎవరు ఉన్నారు?..

ప్రభుత్వ అధికారుల సహకారం ఏ మేరకు ఉన్నది?.. డబ్బు ఎవరి నుంచి ఎవరికి ఏయే రూపాల్లో బదిలీ అయింది?.. ఇలాంటి అనేక అంశాలు వెలుగులోకి రావాల్సి ఉన్నదని, వీటిని బహిర్గతం చేయడమే పోలీసు కస్టడీలోకి తీసుకోవాల్సిన అవసరానికి కారణమైందని సీబీఐ ఆ రిపోర్టులో స్పష్టం చేసింది.