ప్రధాని మోదీ హైదరాబాద్​ పర్యటన షెడ్యూల్​ ఖరారు..

ప్రధాని మోదీ హైదరాబాద్​ పర్యటన షెడ్యూల్​ ప్రాథమికంగా ఖరారైంది……

R9TELUGUNEWS.COM.
రంగారెడ్డి జిల్లా ముచ్చింతల్​లోని సమతామూర్తి విగ్రహ లోకార్పణ చేసేందుకు వస్తున్న మోదీ.. రేపు సాయంత్రం 5 గంటలకు ప్రత్యేక హెలికాప్టర్​లో ముచ్చింతల్​లోని శ్రీరామనగరానికి రానున్నారు.

హెలిపాడ్​లో దిగిన తర్వాత సమీపంలోని అతిథి గృహానికి చేరుకుంటారు. అక్కడ సుమారు 10 నిమిషాలపాటు రీప్రెష్ అవుతారు. అనంతరం నేరుగా యాగశాలకు వస్తారు.

యాగశాలలో సాయంత్రం 6 గంటలకు పెరుమాళ్లను దర్శించుకొని విశ్వక్ సేనుడి పూజ చేస్తారు.

అనంతరం సమతామూర్తి కేంద్రానికి చేరుకుంటారు. అక్కడ నిర్మించిన 108 దివ్యదేశాలతోపాటు భద్రవేది మొదటి అంతస్తులోని స్వర్ణమయ సమతామూర్తి విగ్రహాన్ని దర్శించుకుంటారు. సుమారు అరగంటపాటు ఈ ప్రక్రియ కొనసాగనుంది.

అనంతరం భద్రవేది మూడో అంతస్తులో 216 అడుగుల రూపంలో కొలువుదీరిన సమతామూర్తి విగ్రహానికి త్రిదండి చినజీయర్​ స్వామితో కలిసి పూజచేస్తారు. అనంతరం సరిగ్గా 7 గంటలకు సమతామూర్తి విగ్రహన్ని జాతికి అంకితమివ్వనున్నారు.

సమతామూర్తి విగ్రహం చెంతనే సుమారు అరగంట పాటు ప్రధాని మోదీ ప్రసంగిస్తారు.

అనంతరం మోదీ సమక్షంలోనే రామానుజచార్యుల విగ్రహంపై 15 నిమిషాలపాటు 3డీ లైటింగ్ ప్రదర్శిస్తారు. ఆ ప్రదర్శనను మోదీ ఆసాంతం తిలకిస్తారు.

అక్కడి నుంచి మరోసారి యాగశాలకు చేరుకొని ఆరోజు నిర్వహించిన శ్రీలక్ష్మీనారాయణ యాగానికి పూర్ణాహుతి పలకనున్నారు.

ఈ సందర్భంగా 5వేల మంది రుత్వికులు ప్రధాని మోదీకి వేద అశీర్వచనం ఇస్తారు.

అయితే పరిస్థితులకు అనుగుణంగా ఈ షెడ్యూల్​లో మార్పులు జరగవచ్చని నిర్వాహకులు తెలిపారు.