భార‌త్‌కు ఎగువ‌న బ్ర‌హ్మ‌పుత్ర‌పై డ్యామ్స్..

చైనా తన తాజా పంచ‌వ‌ర్ష ప్ర‌ణాళిక (2021-25)లో కీల‌క ప్ర‌తిపాద‌న చేసింది…
భార‌త్‌కు ఎగువ‌న బ్ర‌హ్మ‌పుత్ర న‌దిపై డ్యామ్‌లు నిర్మించ‌డానికి గ్రీన్‌సిగ్న‌ల్ ఇచ్చింది. ఈ ప్ర‌తిపాద‌న‌ను ఈ నెల 11న నేష‌న‌ల్ పీపుల్స్ కాంగ్రెస్ (ఎన్‌పీసీ) అధికారికంగా ఆమోదించ‌నుంది. ఈ ముసాయిదా పంచ‌వ‌ర్ష ప్ర‌ణాళిక‌ను ఈ నెల 5న ఎన్‌పీసీ ముందు ఉంచారు. యార్లుంగ్ ఝాంగ్బో (బ్ర‌హ్మ‌పుత్ర‌) దిగువ‌న హైడ్రోప‌వ‌ర్ బేస్‌ల‌ను నిర్మించాల‌ని ఈ ప్ర‌ణాళిక ప్ర‌తిపాదించింది. బ్ర‌హ్మ‌పుత్ర దిగువ అంటే టిబెట్ ప్రాంతంగా చెప్ప‌వ‌చ్చు. ఆ త‌ర్వాతే ఈ న‌ది భార‌త్‌లోకి ప్ర‌వేశిస్తుంది. యార్లుంగ్ ఝాంగ్బో దిగువ‌న డ్యామ్‌ల‌కు అనుమ‌తి ఇవ్వాల్సిందిగా హైడ్రోప‌వ‌ర్ కంపెనీలు చాలా రోజులుగా డిమాండ్ చేస్తున్నాయి. ఇప్పుడు చైనా దానిని పంచ‌వ‌ర్ష ప్ర‌ణాళిక‌లో పెట్టిందంటే దానికి అధికారికంగా ఆమోదం తెలిపిన‌ట్లే. ఈ సంస్థ‌ల ప్ర‌తిపాద‌న‌ల్లో ఇండియాకు స‌మీపంలోని డ్యామ్‌లు కూడా ఉన్నాయి. ఈ ముసాయిదా ప్రణాళిక‌ను క‌మ్యూనిస్ట్ పార్టీ నియంత్ర‌ణ‌లో ఉన్న ఎన్‌పీసీ ఎలాంటి మార్పులు లేకుండా ఆమోదించే అవ‌కాశం ఉంది. అదే జ‌రిగితే జ‌ల విద్యుత్ పేరుతో బ్ర‌హ్మ‌పుత్ర‌లో చైనా నీటి దోపిడీ మొద‌లైన‌ట్లే. యార్లుంగ్ ఝాంగ్బో దిగువ‌న డ్యామ్‌ల గురించి 142 పేజీల ఈ ముసాయిదా ప్రాణాళిక‌లో 30వ పేజీలో ప్ర‌స్తావించారు. అంతేకాదు వీటికి అత్యంత ప్రాధాన్యం ఇవ్వాల‌ని కూడా అందులో స్ప‌ష్టం చేశారు. గ‌తంలో యార్లుంగ్ ఝాంగ్బో ఎగువ‌, మ‌ధ్య ప్రాంతాల్లో డ్యామ్స్ ప్ర‌ణాళిక‌ల‌పై ఇండియా ఆందోళ‌న వ్య‌క్తం చేసింది. అయితే కేవ‌లం విద్యుత్ ఉత్ప‌త్తి కోస‌మే నీటిని నిల్వ చేస్తున్నార‌ని, పైగా బ్ర‌హ్మ‌పుత్ర పూర్తిగా పై నుంచి వ‌చ్చే ప్ర‌వాహంపైనే ఆధార‌ప‌డ‌ద‌ని భార‌త అధికారులు అభిప్రాయ‌ప‌డ్డారు. అయితే తాజాగా దిగువ భాగంలో డ్యామ్స్ నిర్మాణానికి చైనా ఓకే చెప్ప‌డం మాత్రం ఆందోళ‌న క‌లిగించేదే. ఈ డ్యామ్స్ అరుణాచ‌ల్‌ప్ర‌దేశ్‌కు చేరువ‌గా ఉండ‌టంతో దిగువ‌కు వ‌చ్చే నీటి ప్ర‌వాహంపై ప్ర‌భావం చూపే అవ‌కాశం ఉన్న‌ద‌ని ఇండియా ఆందోళ‌న వ్య‌క్తం చేస్తోంది.