తెలంగాణ జాగృతి సంస్థ అధ్యక్షురాలు కవిత సోషల్ మీడియా ప్లాట్‌ఫామ్‌ ఎక్స్‌లో ఆసక్తికర పోస్ట్ చేశారు. జూబ్లీహిల్స్ ఉప ఎన్నిక ఫలితాలు వెలువడిన వేళ కవిత ఈ పోస్టు చేయడం తీవ్ర చర్చనీయాంశంగా మారింది. వివరాలు… జూబ్లీహిల్స్ ఉప ఎన్నికలో కాంగ్రెస్ అభ్యర్థి నవీన్ యాదవ్ ఘన విజయం సాధించారు. ప్రతి రౌండ్‌లో ఆధిక్యం కనబరిచిన నవీన్ యాదవ్… 24,729 ఓట్ల మెజారిటీతో విజయం అందుకున్నారు. నవీన్ యాదవ్ విజయంతో బీఆర్ఎస్ సిట్టింగ్ స్థానం కాంగ్రెస్ ఖాతాలో చేరింది. అయితే ఏ విషయాన్ని ప్రస్తావించని కవిత ఎక్స్‌లో ‘‘కర్మ హిట్స్ బ్యాక్’’ (Karma hits back) అని పేర్కొన్నారు..అయితే కవిత బీఆర్ఎస్‌ను ఉద్దేశించే ఈ పోస్టు చేశారని నెటిజన్లు చర్చించుకుంటున్నారు. కవిత పోస్టుపై బీఆర్ఎస్ కార్యకర్తలు, అభిమానులు మండిపడుతున్నారు. మరోవైపు బీఆర్ఎస్ వ్యతిరేకులు మాత్రం కవితకు అనుకూలంగా కామెంట్స్ చేస్తున్నారు.
ఇక, బీఆర్ఎస్ నేతలు హరీష్ రావు, సంతోష్, కేటీఆర్‌లపై కవిత సంచలన ఆరోపణలు చేసిన సంగతి తెలిసిందే. బీఆర్ఎస్ నుంచి సస్పెండ్ చేయడంతో… ఆ పార్టీకి రాజీనామా చేసి బయటకు వచ్చిన తన సొంతంగా కార్యక్రమాలు చేపడుతున్నారు. తెలంగాణ జాగృతి జనం బాట పేరుతో రాష్ట్రవ్యాప్తంగా పర్యటిస్తున్నారు. ఇటీవల వరంగల్‌లో కవిత మీడియాతో మాట్లాడుతూ… బీఆర్ఎస్ పార్టీలో నుంచి చాలా అవమానకరంగా బయటకు పంపించారని ఆవేదన వ్యక్తం చేశారు. ఉరి శిక్షి విధించినవాళ్లను కూడా ఏమైందనేది అడుగుతారని అన్నారు. తాను ఏం తప్పు చేశాననేది తనకు తెలియదని తెలిపారు. ఒకవేళ తాను తప్పు చేశాననే అనుకుంటే… ముందుగా ఒక షోకాజ్ నోటీసు కూడా ఇవ్వకుండా డైరెక్ట్‌గా సస్పెండ్ చేయడం ఎంతవరకు కరెక్ట్ అని ప్రశ్నించారు..
