రోగి కిడ్నీలో 418 రాళ్లు!..

రోగి కిడ్నీలో 418 రాళ్లు!

తీవ్ర అస్వస్థతతో ఆసుపత్రిలో చేరిన ఓ వ్యక్తి కిడ్నీ నుంచి ఏకంగా 418 వరకు రాళ్లను హైదరాబాద్ లో ఓ ప్రైవేట్ హాస్పిటల్ వైద్యులు బయటకు తీశారు…

ఓ వ్యక్తి కిడ్నీ నుంచి ఒకటి కాదు.. రెండు కాదు.. ఏకంగా 418 రాళ్లు తొలగించారు. తీవ్ర అస్వస్థతకు గురై ఆసుపత్రిలో చేరిన వ్యక్తికి హైదరాబాద్ సోమాజిగూడలోని ఏసియన్‌ ఇన్‌స్టిట్యూట్‌ ఆఫ్‌ నెఫ్రాలజీ అండ్‌ యూరాలజీ (ఏఐఎన్‌యూ) డాక్టర్లు చికిత్స నిర్వహించి రాళ్లను బయటకు తీశారు. ఎలాంటి సర్జరీ లేకుండానే.. చాలా సులభంగా రాళ్లను తొలగించారు… ఓ 60 ఏళ్ల వయసున్న వ్యక్తి కిడ్నీ దెబ్బతినడంతో ఏఐఎన్‌యూ హాస్పిటల్‌లో చేరారు. వివిధ పరీక్షల తర్వాత అతనికి మూత్రపిండాల్లో పెద్ద సంఖ్యలో రాళ్లు ఉన్నట్లు డాక్టర్లు గుర్తించారు. దీంతో చికిత్స నిర్వహించి రాళ్లు తొలగించాలని డాక్టర్లు కె.పూర్ణచంద్రారెడ్డి, డాక్టర్‌ గోపాల్‌, డాక్టర్‌ దినేష్‌ బృందం నిర్ణయించింది. ఎటువంటి కోత లేకుండా పెర్క్యుటేనియస్‌ నెఫ్రోలితోటమీ (పీసీఎన్‌ఎల్‌) విధానంలో మినిమల్లీ ఇన్వేజివ్‌ పద్ధతిలో శస్త్రచికిత్స చేశారు..చిన్న చిన్న రంధ్రాలతో లోపలకు సూక్ష్మ కెమెరాను, లేజర్‌ ప్రోబ్‌లను పంపి రాళ్లను బయటకు తీశారు. దాదాపు 418 రాళ్లు బయటకు తీసినట్లు డాక్టర్లు తెలిపారు. అనంతరం అతడి కిడ్నీ పనితీరు మెరుగుపడటంతో డిశ్చార్జి చేశామని వెల్లడించారు. ఈ మొత్తం చికిత్స ప్రక్రియకు దాదాపు రెండు గంటల సమయం పట్టిందని వివరించారు. కిడ్నీ ఆరోగ్యం కాపాడుకోవటానికి తగినన్ని జాగ్రత్తలు తీసుకోవాలని డాక్టర్లు చెబుతున్నారు. ఉప్పు తక్కువగా తీసుకోవటంతో పాటు తగినన్ని నీళ్లు తాగాలని సూచిస్తున్నారు.