🙏 ఓం శ్రీ గురుభ్యోనమః 🙏
🍁పంచాంగం🍁
శ్రీరస్తు – శుభమస్తు – అవిఘ్నమస్తు,
తేదీ. … 04 – 10 – 2023,
వారం … సౌమ్యవాసరే ( బుధవారం )
శ్రీ శోభకృత్ నామ సంవత్సరం,
దక్షిణాయనం – వర్ష ఋతువు,
భాద్రపద మాసం – బహళ పక్షం,
తిథి : పంచమి ఉ8.56 వరకు,
నక్షత్రం : రోహిణి రా10.41 వరకు,
యోగం : సిద్ధి ఉ11.39 వరకు,
కరణం : తైతుల ఉ8.56 వరకు,
తదుపరి గరజి రా8.52 వరకు,
వర్జ్యం : మ2.35 – 4.12 & తె4.28నుండి,
దుర్ముహూర్తము : ఉ11.26 – 12.13,
అమృతకాలం : రా7.26 – 9.04,
రాహుకాలం : మ12.00 – 1.30,
యమగండo : ఉ7.30 – 9.00,
సూర్యరాశి : కన్య,
చంద్రరాశి : వృషభం,
సూర్యోదయం : 5.54,
సూర్యాస్తమయం: 5.46,
*_నేటి మాట_*
*దైవంతో అనుబంధం – ఎలా ఉండాలి???*
భగవంతుడితో మనలో చాలామందికి వ్యాపార బంధమే తప్ప ప్రేమానుబంధం లేదు. *సాధారణంగా మన మొక్కులన్నీ ఇచ్చిపుచ్చుకొనే ధోరణిలోనే సాగుతుంటాయి.*
‘నా ఈ కోరిక తీరిస్తే నీకు ఇన్ని కొబ్బరికాయలు కొడతాను. ఈ కానుకలిస్తాను. ఈ పూజలు చేయిస్తాను…’- *ఇలా ఉంటాయి మనలో చాలామంది దైవ వ్యవహారాలు.*
దైవంతో అనుబంధం
భగవంతుడితో నవవిధ భక్తులనే తొమ్మిదిరకాల అనుబంధానికి ఆస్కారం ఉంది. *వాటిలో ఏ ఒక్క అనుబంధం దృఢంగా ఉన్నా ఆయన మనల్ని వదలడు.* లేకపోతే… మనకు దొరకడు. *భగవంతుడు సర్వేశ్వరుడనే విశ్వాసం ఉంటేనే చాలదు.* మనం చేసే యాంత్రిక పూజలూ వాటంతటవే అక్కరకు రావు.
*దైవాన్ని తండ్రిగా ఆరాధిస్తే మనం ఒక మంచిబిడ్డగా జీవించాలి. ఆయన్ను ఏ రూపంలో ఆరాధించినా ఈ పద్ధతి పాటించాలి.* శ్రీరామ పాదసేవకుడిగా ఉన్న ఆంజనేయుడు భక్తుడిగాను, దేవుడిగాను పూజలందు కుంటున్నాడు.
*సంకీర్తనలతో అన్నమయ్య, త్యాగయ్యలు దైవాన్ని మెప్పించి, తమ సన్నిధికి రప్పించుకొన్నారు* తులసీదాసు తన *‘రామచరితమానస్‌’* ద్వారా శ్రీరాముడి మనసు దోచాడు. *మూఢభక్తితో కన్నప్ప తన రెండు నేత్రాలను శివుడికి సమర్పించి దివ్యసాక్షాత్కారం పొందాడు. తన శరీరంలోని భాగాలనే రుద్రవీణగా చేసి రావణుడు ముక్కంటిని మెప్పించాడు.*
సుదీర్ఘమైన కాలవాహినిలో ఎందరో భక్తులు పూజాపుష్పాల్లా తేలియాడి, పరమాత్మలో లయించి పోయారు. వారు ఇప్పుడు లేరు. *కానీ, వారి గాథలు శిలాక్షరాల్లా నిలిచి ఉన్నాయి.*
ఈ గాథలన్నీ భగవంతుడితో మన అనుబంధం ఎలా ఉండాలో చెబుతాయి. *నిత్యమూ లక్షల సంఖ్యలో ప్రజలు దేవాలయాలను దర్శించుకుంటూ ఉంటారు. భగవంతుడికి వారు ఏమి ఇస్తున్నారు, ఏమి తీసుకెళ్తున్నారు? కోరికల జాబితా ఇస్తున్నారు. తమ కోరికలు తప్పక నెరవేరతాయనే గట్టి నమ్మకాన్ని వెంట తీసుకువెళ్తున్నారు, అంతే!*
*దీన్ని దైవంతో అనుబంధమని ఎలా చెప్పగలం?* ప్రాపంచిక బంధాలనే సంకెళ్లతో మనం భగవంతుడి ఎదుట నిలబడుతున్నాం. భక్తిపూర్వకంగానే అనుకుంటూ కనులు మూసి చేతులు జోడిస్తున్నాం. మనసు మెల్లిగా కోరికల జాబితా విప్పుతుంటుంది. *దేవుడు మాటమాటకు, ప్రతి భక్తుడి బూటక భక్తికీ నవ్వలేక, శిలాదరహాసం వెలయిస్తాడు. ఆ మందహాస మర్మం మనకు అర్థంకాదు.*
ఈ భ్రమాభరిత భక్తినాటకం నుంచి మనం బయటపడాలి. *నిలువుదోపిడి ఇచ్చినట్లు, మనసునంతా ఖాళీ చేసి ఆయన పాదాలముందు గుమ్మరించాలి.* కోరికలన్నీ శూన్యం చేసుకున్నట్లు, నీలాలు లేని తలతో నిలబడినట్లు ఆయన ఎదుట నిస్సహాయుడిగా, *‘నీవే దిక్కు’* అన్నట్లు చేతులు జోడించి నిలబడిపోవాలి. *మనం దైవానుగ్రహం కోసం ఎంతగా నిరీక్షిస్తామో, భగవంతుడు మంచి భక్తుడి కోసం అలాగే ఎదురుచూస్తాడు.*
*పరిపక్వత చెందిన మనసే ఫలంగా కోరికలు లేని సమర్పణా భావాలు సుగంధ పుష్పాలుగా, సర్వలోక క్షేమమే మహత్వాకాంక్షగా నిర్మల నివేదనగా సమర్పించాలి.*
అలా అతికొద్దిమంది మాత్రమే చేయగలరు.
*ఆ కొద్దిమందిలో మనం ఎందుకుండ కూడదు?* తిరుమలలో ఒక గదినుంచి మరో గదికి వెళ్తూ చివరికి స్వామి దివ్య సన్నిధికి చేరుకుంటాం. *మన మనసు అనుక్షణమూ అన్నమయ్య ఆర్తిని అనుభవిస్తూ దైవంతో అనుబంధానికి తపించాలి.* వెన్నతినే వేలుపు ఆయన. *వెంటనే మన ఆర్తికి కరిగిపోతాడు. తప్పిపోయిన బిడ్డ తిరిగి వచ్చినట్లు భావించి ఆప్యాయంగా అక్కున చేర్చుకుంటాడు.*
*అదే అసలైన అనుబంధం*
*_🍁శుభమస్తు🍁_*
🙏సమస్త లోకా సుఖినోభవంతు 🙏