తెలంగాణ అసెంబ్లీ ఎన్నికల్లో పోటీ చేసే అంశంపై వైఎస్సాఆర్‌టీపీ వైఎస్ షర్మిల కీలక నిర్ణయం..

తెలంగాణ అసెంబ్లీ ఎన్నికల్లో పోటీ చేసే అంశంపై వైఎస్సాఆర్‌టీపీ అధ్యక్షురాలు వైఎస్ షర్మిల కీలక నిర్ణయం తీసుకున్నారు. ఈ ఎన్నికల్లో పోటీకి దూరంగా ఉంటునున్నట్లు ఆమె ప్రకటించారు. అదే సమయంలో కాంగ్రెస్ పార్టీకి మద్దతు ఇవ్వాలని డిసైడ్ అయ్యారు. లోటస్ పాండ్ పార్టీ కార్యాలయంలో ముఖ్యనేతలతో కీలక సమావేశం నిర్వహించిన వైఎస్ షర్మిల తన నిర్ణయాన్ని ప్రకటించారు. ప్రభుత్వ వ్యతిరేక ఓటు చీలకూడదన్న భావనతో తాము ఎన్నికలకు దూరంగా ఉండి కాంగ్రెస్ పార్టీకి మద్దతు ఇస్తున్నట్లు చెప్పారు.’తెలంగాణలో సీఎం కేసీఆర్‌పై వ్యతిరేకత ఉంది. వ్యతిరేక ఓటు చీలితే కేసీఆర్ మళ్లీ సీఎం అవుతారు.. కేసీఆర్‌ను గద్దె దించడమే తమ లక్ష్యం. వచ్చే ఎన్నికల్లో బీఆర్ఎస్ వ్యతిరేక ఓటు చీలకుండా చూస్తాం. వ్యతిరేక ఓటు చీలకుండా చూడాలని.. రాష్ట్రంలో తమ పార్టీకి గెలుపు అవకాశాలు ఉన్నాయి అడ్డుపడొద్దని కాంగ్రెస్ పార్టీ కోరింది. కాంగ్రెస్ పార్టీ విజ్ఞప్తి మేరకు పోటీకి దూరంగా ఉంటున్నాం.’ అని షర్మిల వెల్లడించారు.కాంగ్రెస్‌ పార్టీని దెబ్బతీయాలనే ఉద్దేశం తమకు లేదని.. ఈ ఎన్నికల్లో కాంగ్రెస్‌ పార్టీ గెలిచే అవకాశం ఉందని అన్నారు. ప్రభుత్వం మారే అవకాశం వచ్చినప్పుడు అడ్డుపడటం సరికాదని చెప్పారు. దేశంలో కాంగ్రెస్ పార్టీ అతిపెద్ద సెక్యూలర్ పార్టీ అని.. ఆ పార్టీకి మద్దతు ఇవ్వాలని కార్యకర్తలు, ముఖ్యనేతలకు ఆమె సూచించారు.

కాగా, వైఎస్సార్టీపీ కాంగ్రెస్ పార్టీలో విలీనం అవుతోందని అప్పట్లో వార్తలు వచ్చాయి. ఈ మేరకు కాంగ్రెస్ అగ్రనేతలు సోనియా గాంధీ, రాహుల్ గాంధీతో షర్మిల చర్చలు సైతం జరిపారు. కానీ తెలంగాణ కాంగ్రెస్‌లోని ఓ వర్గం షర్మిల రాకను తీవ్రంగా వ్యతిరేకించారు. దీంతో కాంగ్రెస్‌లో వైఎస్సార్టీపీ విలీనానికి బ్రేక్ పడింది. ఈ పరిణామంతో వచ్చే ఎన్నికల్లో ఒంటరిగానే పోటీ చేస్తామని షర్మిల ఇటీవల ప్రకటించారు. తాను పాలేరు నుంచి బరిలోకి దిగనన్నట్లు వెల్లడించారు.

కానీ అనూహ్యంగా ఇవాళ ముఖ్య నాయకులతో భేటీ అయిన షర్మిల.. కాంగ్రెస్ పార్టీకి మద్దతు ఇస్తున్నట్లు ప్రకటించారు. కాంగ్రెస్ పార్టీ అధికారంలోకి వస్తే తగిన ప్రాధాన్యత ఇస్తామన్న హామీతోనే షర్మిల కాంగ్రెస్‌కు మద్దతు ఇచ్చినట్లు వార్తలు వినిపిస్తున్నాయి. అయితే ఇది వరకే తెలంగాణ జనసమతి కాంగ్రెస్‌కు మద్దతు తెలపగా.. తాజాగా వైఎస్సాఆర్‌టీపీ కూడా మద్దతు ప్రకటించింది. దాంతో కాంగ్రెస్ పార్టీకి బలం పెరిగినట్లయింది.