తెలంగాణ నూతన సెక్రటేరియట్ ప్రారంభోత్సవం వాయిదా..
_రాష్ట్రంలో టీచర్స్ ఎమ్మెల్సీ ఎన్నిక, హైదరాబాద్ లోకల్ బాడీ ఎమ్మెల్సీ ఎన్నికల కోడ్ అమల్లో ఉండటంతో వాయిదా పడిన సెక్రటేరియట్ ప్రారంభోత్సవం…
తెలంగాణ కొత్త సచివాలయ ప్రారంభోత్సవం మళ్లీ వాయిదా పడింది. ఈ నెల 17న సీఎం కేసీఆర్ జన్మదినం సందర్భంగా కొత్తగా నిర్మించిన రాష్ట్ర సెక్రటేరియట్‌ను ప్రారంభించాలని ప్రభుత్వం ముహూర్తం ఫిక్స్ చేసుకుంది. కేసీఆర్ చేతుల మీదుగా సచివాలయాన్ని ప్రారంభించేందుకు అధికారులు ఏర్పాట్లలో కూడా మునిగిపోయారు. కానీ ఇప్పుడు ప్రారంభోత్సవం కొద్దిరోజుల్లోనే ఉందనుకున్న సమయంలో వాయిదా వేశారు…
ఎమ్మెల్సీ ఎన్నికల కోడ్ కారణంగా కొత్త సెక్రటేరియట్ ప్రారంభోత్సవాన్ని వాయిదా వేసినట్లు ప్రభుత్వం వెల్లడించింది. గురువారం ఎమ్మెల్సీ ఎన్నికల షెడ్యూల్‌ను కేంద్ర ఎన్నికల సంఘం ప్రకటించగా.. నోటిఫికేషన్ కూడా వచ్చేసింది. తెలంగాణలో ఖాళీగా ఉన్న రెండు ఎమ్మెల్సీ స్థానాలకు ఎన్నికలు జరుగుతున్నాయి. నిబంధనల ప్రకారం ఎన్నికల నోటిఫికేషన్ వచ్చిన దగ్గర నుంచి కోడ్ అమల్లో ఉంటుంది. ఎన్నికలు జరిగే నియోజకవర్గాల్లో కోడ్‌ను అధికారులు అమలు చేస్తారు. ప్రస్తుతం హైదరాబాద్ పరిధిలోని ఎమ్మెల్సీ స్థానానికి ఎన్నిక జరుగుతుంది. ఎమ్మెల్సీ కోడ్ అమల్లో ఉండటంతోనే సెక్రటేరియట్ ప్రారంభోత్సవం వాయిదా వేశామని, ఇందులో వేరే కారణం ఏమీ లేదని ప్రభుత్వ వర్గాలు చెబుతున్నాయి.
సెక్రటేరియట్ ప్రారంభోత్సవం వాయిదా పడటం ఇది తొలిసారి కాదు. గతంలో అనేకసార్లు ప్రభుత్వం ముహూర్తం ఫిక్స్ చేసిన తర్వాత చివరి నిమిషంలో వాయిదా పడుతూ వస్తోంది. గత నెలలో సంక్రాంతి రోజున ప్రారంభించాలని ప్రభుత్వ వర్గాలు భావించాయి. కానీ పనులు పూర్తి కాకపోవడంతో వాయిదా వేశారు. ఇప్పుడు మరోసారి చివరి నిమిషంలో వాయిదా పడటం చర్చనీయాంశంగా మారింది. ఎమ్మెల్సీ ఎన్నికలు ముగిసిన తర్వాత ప్రారంభోత్సవానికి మరో డేట్‌ను ఫిక్స్ చేయనున్నారు..