బ్రిక్స్‌ శిఖరాగ్ర సమావేశానికి ఆతిథ్యం ఇవ్వడానికి చైనా సోమవారం భారతదేశానికి మద్దతు…

ఈ ఏడాది బ్రిక్స్‌ శిఖరాగ్ర సమావేశానికి ఆతిథ్యం ఇవ్వడానికి చైనా సోమవారం భారతదేశానికి మద్దతు ప్రకటించింది. అభివృద్ధి చెందుతున్న ఆర్థిక వ్యవస్థల ఐదుగురు సభ్యుల సమూహంలో సహకారాన్ని బలోపేతం చేయడానికి భారతదేశంతో కలిసి పనిచేస్తామని స్పష్టం చేసింది. 2021 సంవత్సరానికి బ్రిక్స్ (బ్రెజిల్, రష్యా, ఇండియా, చైనా, దక్షిణాఫ్రికా) చైర్మన్ పదవిని భారత్ స్వీకరించింది. ఈ సంవత్సరం శిఖరాగ్ర సమావేశాన్ని కూడా భారత్‌ నిర్వహించనున్నది. ఫిబ్రవరి 19 న న్యూఢిల్లీలోని సుష్మా స్వరాజ్ భవన్‌లోని బ్రిక్స్ సెక్రటేరియట్‌లో విదేశాంగ మంత్రి ఎస్ జైశంకర్ భారతదేశ బ్రిక్స్ 2021 వెబ్‌సైట్‌ను ప్రారంభించారు.,,శిఖరాగ్ర సమావేశానికి ఆతిథ్యం ఇవ్వడంలో భారత్‌కు చైనా మద్దతు ఇస్తుందని చైనా విదేశాంగ శాఖ ప్రతినిధి వాంగ్ వెన్బిన్ మీడియా సమావేశంలో తెలిపారు. ‘బ్రిక్స్ అనేది అభివృద్ధి చెందుతున్న ఆర్థిక వ్యవస్థలు, అభివృద్ధి చెందుతున్న దేశాలతో కూడిన ఒక సహకార విధానం. ఇటీవలి సంవత్సరాల్లో ఇది ఎక్కువ సంఘీభావం, లోతైన ఆచరణాత్మక సహకారం, ఎక్కువ ప్రభావాన్ని చూపింది’ అని వాంగ్ చెప్పారు. అంతర్జాతీయ వ్యవహారాల్లో బ్రిక్స్ ఇప్పుడు సానుకూల, స్థిరమైన, నిర్మాణాత్మక శక్తిగా ఉన్నదని, ఈ యంత్రాంగానికి చైనా ప్రాముఖ్యతను ఇస్తుందని ఆయన వెల్లడించారు. అయితే, ఈ ఏడాది చివర్లో జరుగనున్న శిఖరాగ్ర సమావేశానికి చైనా అధ్యక్షుడు జీ జిన్‌పింగ్ హాజరవుతారా అని విషయాన్ని వాంగ్ పేర్కొనకపోవడం విశేషం. గత ఏడాదితోపాటు రష్యా ఆతిథ్యమిచ్చిన బ్రిక్స్‌ అన్ని వార్షిక శిఖరాగ్ర సమావేశాలకు జిన్‌పింగ్‌ హాజరయ్యారు. గత ఏడాడి రష్యాలో జరిగిన శిఖరాగ్ర సదస్సుకు భారత ప్రధాని నరేంద్ర మోదీ కూడా పాల్గొన్నారు.