ప్రభుత్వ ఉపాధ్యాయులకు సంక్రాంతి వేళ తెలంగాణ సర్కారు శుభవార్త…

ప్రభుత్వ ఉపాధ్యాయులకు సంక్రాంతి వేళ తెలంగాణ సర్కారు శుభవార్త వినిపించింది. గత కొంతకాలంగా పెండింగ్‌లో టీచర్ల బదిలీలు.. పదోన్నతులకు ఎట్టకేలకు గ్రీన్ సిగ్నల్ ఇచ్చింది తెలంగాణ ప్రభుత్వం. కాగా.. ఉపాధ్యాయ సంఘాలతో మంత్రులు హరీశ్ రావు, సబితా ఇంద్రారెడ్డి సమావేశమయ్యారు. ఉపాధ్యాయ బదిలీలు, పదోన్నతులపై ఉపాధ్యాయ నాయకులతో చర్చించారు. ఈ సమావేశంతో తమ ఇబ్బందులు, సమస్యలతో పాటు పలు విజ్ఞప్తులు కూడా మంత్రులకు విన్నవించారు ఉపాధ్యాయ నాయకులు. కాగా… సానుకూలంగా స్పందించిన మంత్రులు.. ప్రధానంగా బదిలీలు, ప్రమోషన్లకు గ్రీన్ సిగ్నల్ ఇచ్చారు. మరో రెండు, మూడు రోజుల్లో ఇందుకు సంబంధించిన షెడ్యూల్ విడుదల చేయనున్నట్టు పేర్కొన్నారు.పండగ పూట తెలంగాణ ప్రభుత్వం చెప్పిన ఈ గుడ్ న్యూస్‌తో ఉపాధ్యాయుల్లో ఆనందం వెల్లివిరుస్తోంది. ఎప్పటి నుంచో పెండింగ్‌లో ఉన్న బదిలీలు, ప్రమోషన్లకు గ్రీన్ సిగ్నల్ ఇచ్చినందుకు ప్రభుత్వానికి ఉపాధ్యాయులు కృతజ్ఞతలు చెప్తున్నారు. ఈ శుభవార్తతో పండుగ సంబురాలు రెట్టింపు ఉత్సాహంతో చేసుకుంటున్నారు.