ఇథియోపియాలో పేలిన అగ్నిప్రమాదం
కిలోమీటర్ల ఎత్తులో ఎగసిన రసాయన బూడిద
వేల కి.మీ. దూరంలోని భారత్‌పై దట్టంగా ధూళి
వాతావరణ సమస్యలు, ఆరోగ్యాలకు దెబ్బ
అనేక విమానాలు రద్దు, మరికొన్ని దారిమళ్లింపు.
ఉత్తర భారతం ఈ కాలంలో చాలా సమస్యలు ఎదుర్కొంటుుంది. చలికాలం, పొగమంచు, కాలుష్యం, శ్వాసకోశ ఇబ్బందులు.. ప్రతిసారీ ఇదే కథ. కానీ ఈసారి మరో కొత్త ప్రమాదం వచ్చేసింది. మన దేశం వైపు అగ్నిపర్వత బూడిద మేఘం దూసుకొస్తుందన్న సమాచారం ప్రజల్లో ఆందోళనను రేకెత్తించింది. ఎక్కడో ఇథియోపియాలో జరిగిన అగ్నిపర్వత విస్ఫోటనం ప్రభావం..
Ethiopia volcano
వేల కిలోమీటర్ల దూరంలో ఉన్న భార‍తదేశంపై పడుతుందనడమే ఒక గ్లోబల్ రియాలిటీని గుర్తుచేస్తోంది. ఒక మూలలో జరిగిన ప్రకృతి ఘటన మరొక చివరికి ముప్పు తెచ్చేస్తోంది. అగ్నిపర్వత విస్ఫోటనం అంటే కేవలం అగ్ని కీలలు కాదు.. ఆగ్రహంతో బయటకు విసిరేసిన బూడిద, సల్ఫర్ డైఆక్సైడ్, సన్నని రాళ్లు, గాజు ముక్కలు ఇవన్నీ కలిసి ఆకాశంలో ఒక మసక మబ్బు తయారైంది. దీన్ని చూసిన వారికి ఇది సాధారణ మేఘంలా అనిపించినా.. వాస్తవానికి ఇది ఆకాశంలో ఘోర ప్రమాదం లాగా పని చేస్తుంది. కారణం స్పష్టం ఈ బూడిదలోని సూక్ష్మకణాలు గాలిలోకి చేరితే ఆరోగ్యానికి ప్రమాదం.. విమానాల ఇంజిన్లకు మాత్రం మహా ముప్పు…
45 వేల అడుగుల ఎత్తుకు చేరే అవకాశం..!
Ethiopia volcano
ఇథియోపియాలోని ‘హేలీ గుబ్బి’ అగ్నిపర్వతం విస్ఫోటనం ఈ పెద్ద మేఘానికి కారణం. ఈ బూడిద 15 వేల అడుగులు, 25 వేల అడుగులు.. కొన్నిసార్లు 45 వేల అడుగుల ఎత్తులో కూడా వ్యాపించగలదని నిపుణులు చెబుతున్నారు. ప్రస్తుతం అది ఎర్రసముద్రం దాటి అరేబియా ప్రాంతంలోకి ప్రవేశించి, అక్కడి నుంచి భారత్ వైపు ప్రయాణిస్తోంది. గుజరాత్, ఢీల్లీ-ఎన్‌సీఆర్, రాజస్థాన్, పంజాబ్, హరియాణ, హిమాలయ ప్రాంతాలు ఈ రాష్ట్రాలు ప్రభావితమయ్యే అవకాశముందని ఐఎండీ అంచనా పెట్టింది..
హైలీ గుబ్బి అగ్నిపర్వతం బద్దలైంది. ఈ అగ్నిపర్వతం సుమారు 10,000 సంవత్సరాలలో తొలిసారి విస్ఫోటనం చెందింది. అగ్నిపర్వతం బద్దలు కావడంతో భారీగా బూడిద, పొగ వెలువడుతున్నాయి…ఈ క్రమంలోనే ప్రభావిత ప్రాంతంలో పలు విమాన సర్వీసులకు తీవ్ర అంతరాయం ఏర్పడింది. అగ్నిపర్వతం బద్దలైన తర్వాత భూ వాతావరణంలో 15 కిలోమీటర్ల ఎత్తులోకి పెద్ద ఎత్తున బూడిద, దట్టమైన పొగ వెలువడింది. దట్టమైన బూడిద మేఘాలు ఎర్ర సముద్రం మీదుగా యెమెన్‌, ఒమన్‌, అరేబియా సముద్రం, పాకిస్థాన్‌ మీదుగా భారత్‌వైపు కదులుతున్నాయి.
ఇథియోపియాలోని హేలి గుబ్బి అగ్నిపర్వతం విస్ఫోటనం తర్వాత ఏర్పడిన బూడిద మేఘాలలో ఒకటి ఈరోజు సాయంత్రం పశ్చిమ భారతదేశంలోని కొన్ని ప్రాంతాలలోకి ప్రవేశించి అనేక ఉత్తర రాష్ట్రాల మీదుగా కదులుతుందని ఇండియా మెట్‌ స్కై వెదర్ అంచనా వేసింది. ”బూడిద మేఘం గుజరాత్ (పశ్చిమ వైపు)లోకి ప్రవేశించి రాత్రి 10 గంటలకు రాజస్థాన్, వాయువ్య మహారాష్ట్ర, ఢిల్లీ, హర్యానా, పంజాబ్ వైపు కదులుతుంది… తరువాత అది హిమాలయాలు, ఇతర ప్రాంతాల వైపు కదులుతుంది” అని ఇండియా మెట్‌ స్కై తెలిపినట్టుగా ఏఎన్‌ఐ వార్తా సంస్థ రిపోర్టు చేసింది.
అగ్నిపర్వతం విస్ఫోటనం సమయంలో వాతావరణంలోకి ఎగసిన బూడిద పొగ… ఉత్తర భారతదేశం వైపు గంటకు 100-120 కి.మీ వేగంతో కదులుతోంది. ఇది 15,000-25,000 అడుగుల నుంచి 45,000 అడుగుల ఎత్తులో ప్రయాణిస్తుంది. అగ్నిపర్వత నుంచి వెలువడిన బూడిద… సల్ఫర్ డయాక్సైడ్‌తో పాటు గాజు, రాతి చిన్న కణాలను కలిగి ఉంటుంది. అలాగే మైదాన ప్రాంతాల్లో కూడా బూడిద కురిసే అవకాశం తక్కువగా ఉంటుందని ఇండియా మెట్‌ స్కై పేర్కొంది. భారతీయ నగరాలపై ప్రతికూల ప్రభావాన్ని చూపదని అంచనా వేసింది. ఈ క్రమంలోనే భారతదేశం వైపు బూడిద దూసుకొస్తున్నప్పటికీ ఎలాంటి హెచ్చరికలు జారీ చేయలేదు.
ఇండియా మెట్‌ స్కై వెదర్ ప్రకారం… ఈ బూడిద ప్రభావంతో ఆకాశం సాధారణం కంటే చీకటిగా, మసకగా కనిపించేలా చేస్తుంది. ఎయిర్‌ ట్రాఫిక్ (విమాన సర్వీసులకు)కు అంతరాయం కలిగించవచ్చు. దీనివల్ల విమాన ప్రయాణికులు ఆలస్యం, అంతరాయాలు, ఎక్కువ ప్రయాణ సమయం వంటి పరిస్థితులను ఎదుర్కొనేలా చేస్తుంది.
టౌలౌస్ అగ్నిపర్వత బూడిద సలహా కేంద్రం (VAAC) ప్రకారం… పేలుడు విస్ఫోటనం ఆదివారం ఉదయం 8:30 గంటలకు (UTC కాలమానం) ప్రారంభమైంది. దాదాపు 10,000 సంవత్సరాల నిద్రాణమైన అగ్నిపర్వతం నుంచి విస్ఫోటనం చోటుచేసుకోవడం ఇదే తొలిసారి. సురక్షితమైన విమాన ప్రయాణం కోసం అధికారులు, విమానయాన సంస్థలు బూడిద మేఘాన్ని నిశితంగా ట్రాక్ చేస్తూనే ఉన్నాయి.
ఇక, అగ్నిపర్వతం నుంచి విస్ఫోటనం ఇప్పుడు ఆగిపోయిందని, కానీ పెద్ద బూడిద పొగ ఉత్తర భారతదేశం వైపు కదులుతోందని, వాతావరణ సంస్థలు దాని పథాన్ని నిశితంగా పరిశీలించాలని కూడా టౌలౌస్ వీఏఏసీ తెలియజేసింది.
ఇదిలాఉంటే, ఇథియోపియాలోని హేలీ గుబ్బి అగ్నిపర్వతం విస్ఫోటనం నేపథ్యంలో డీజీసీఏ విమానయాన సంస్థలు, విమానాశ్రయాలకు వివరణాత్మక సలహా జారీ చేసింది.బూడిద మేఘాలు కమ్ముకున్న ప్రాంతాల నుంచి ప్రయాణించవద్దంటూ విమానయాన సంస్థలకు డీజీసీఏ అత్యవసర సూచనలు జారీ చేసింది.
