Man Sues Wife’s Lover:
తైవాన్‌లో ఓ విశేష ఘటన చోటుచేసుకుంది. భార్యతో వివాహేతర సంబంధం పెట్టుకున్న వ్యక్తిపై భర్త కోర్టుకెక్కగా, చివరికి కోర్టు భర్తకు అనుకూలంగా తీర్పు ఇచ్చింది. మానసిక వేదన కలిగించినందుకు లవర్ రూ.37 లక్షల పరిహారం చెల్లించాలని ఆదేశించింది.
వివరాల్లోకి వెళ్తే—వేయ్ అనే వ్యక్తి 2006లో జీ అనే మహిళను వివాహం చేసుకున్నాడు. దాదాపు 15 ఏళ్ల పాటు వారి దాంపత్య జీవితం సాఫీగా సాగింది. జీ ఓ పాఠశాలలో టీచర్‌గా పనిచేస్తుండగా, అదే స్కూల్‌లో అకౌంట్స్ డైరెక్టర్‌గా ఉన్న యాంగ్‌తో 2022లో ఆమెకు సాన్నిహిత్యం పెరిగింది. ఇద్దరూ ఒకరినొకరు భార్యాభర్తలుగా సంబోధించుకునే స్థాయికి చేరుకున్నారు.
ఒక రోజు భార్య ఫోన్‌ పరిశీలించిన వేయ్‌కు ఆ సంబంధం బయటపడింది. వెంటనే యాంగ్‌పై కేసు వేశాడు. తనకు తీవ్రమైన మానసిక వేదన కలిగించినందుకు పరిహారంగా ఒక కోటి తైవాన్ డాలర్లు ఇవ్వాలని డిమాండ్ చేశాడు.
యాంగ్‌ మాత్రం “ఆమెకు పెళ్లయిందని నాకు తెలియదు” అంటూ తప్పించుకునే ప్రయత్నం చేశాడు. కానీ కోర్టు అతడి వాదనను తిరస్కరించింది. వేయ్ ఇప్పటికే మానసిక ఒత్తిడితో బాధపడుతున్నట్లు నిర్ధారించి, యాంగ్‌ రూ.37 లక్షల పరిహారం చెల్లించాలని తీర్పు వెలువరించింది.
గమనించదగ్గ విషయం ఏమిటంటే—2020లో తైవాన్ రాజ్యాంగ ధర్మాసనం “వివాహేతర సంబంధం నేరం కాదు” అని తీర్పు ఇచ్చింది. అయితే, ఈ తరహా సంబంధాల వల్ల మానసికంగా దెబ్బతిన్న జీవిత భాగస్వాములు కోర్టు ద్వారా పరిహారం కోరవచ్చని న్యాయనిపుణులు చెబుతున్నారు.
