భారత్‌పై కుట్ర , పాక్‌కు చైనా యుద్ధనౌక

రెండు పొరుగు దేశాలు చైనా, పాకిస్తాన్.. భారత్‌పై మళ్లీ కుట్ర చేస్తున్నాయి. లడఖ్‌లో భారత సైన్యం ఓడించిన తర్వాత.. చైనా తమ స్నేహితుడు పాకిస్తాన్ కోసం రెండో నావికా పోరాట నౌకను (ఫ్రిగేట్) సిద్ధం చేసింది. చైనాకు చెందిన గ్లోబల్ టైమ్స్ నివేదించిన ప్రకారం వివరాలిలా ఉన్నాయి. ఈ ఫ్రిగేట్ ఆఫ్ చైనా.. మెరుగైన రాడార్ వ్యవస్థలు, దూర ప్రాంతాలపైకి దాడులు చేసే క్షిపణులను కలిగి ఉంటుంది. ఇది పాకిస్తాన్ సముద్ర రక్షణ సామర్థ్యాన్ని పెంచనున్నది. పాకిస్తాన్ నావికాదళం కోసం చైనా ఈ రెండో యుద్ధ నౌకను నిర్మించింది. మరో నాలుగు యుద్ధనౌకలు తయారుచేసి ఇచ్చేందుకు పాకిస్తాన్‌, చైనా దేశాలు సంతకాలు కూడా చేశాయి. 054 ఏ / పీ రకం 4 యుద్ధనౌకల నిర్మాణం కోసం పాకిస్తాన్ నావికాదళం 2017 లో చైనా ప్రభుత్వంతో ఒప్పందం కుదుర్చుకున్నది. మొదటి యుద్ధనౌకను 2020 ఆగస్టు లో ఉత్పత్తి చేశారు. రెండవ యుద్ధ నౌకను శుక్రవారం షాంఘైలో ప్రయోగించారు. ఈ యుద్ధనౌక చైనా పీపుల్స్ లిబరేషన్ ఆర్మీ (పీఎల్‌ఏ) నేవీకి ప్రధాన స్థావరంగా ఉంటుంది. ఇలాంటివి మరో 30 పీఎల్‌ఏ వద్ద ఉన్నాయి. కొత్త యుద్ధనౌక టైప్ 054 ఏ టెక్నాలజీపై ఆధారపడి ఉన్నదని, ఇది చైనా యొక్క అత్యంత అధునాతన యుద్ధనౌక అని నావల్ మిలిటరీ స్టడీస్ రీసెర్చ్ ఇన్‌స్టిట్యూట్ సీనియర్ రీసెర్చ్ ఫెలో జాంగ్ జున్షే తెలిపారు.
8 జలాంతర్గాములకు ఒప్పందం..
గ్లోబల్ టైమ్స్ నివేదించిన ప్రకారం.. పాకిస్తాన్ నావికాదళం.. చైనా నుంచి 8 జలాంతర్గాములను కొనుగోలు చేసేందుకు కూడా ఒప్పందం కుదుర్చుకున్నది. ఈ జలాంతర్గామి టైప్ 039 బీ యువాన్ తరగతికి చెందినవి. ఇవి డీజిల్ ఎలక్ట్రిక్ జలాంతర్గాములు. ఇవి యాంటీ-షిప్ క్రూయిజ్ క్షిపణులను కలిగి ఉంటాయి. ఎయిర్‌ ఇండిపెండెంట్‌ ప్రొపల్షన్‌ వ్యవస్థ కారణంగా వీటికి శబ్దం కూడా తక్కువగా ఉంటుంది. దీంతో వీటిని నీటి అడుగు భాగంలో గుర్తించడం చాలా కష్టమైన పని అని నిపుణులు చెప్తున్నారు.