అంతర్జాతీయ రాజకీయ చిత్రంపై శతాబ్దాలుగా సాగుతున్న ఉత్కంఠకు ఒక కీలక ముగింపు దొరకబోతోందా అన్న ఆశలు రేకెత్తిస్తూ.. అమెరికా అధ్యక్షుడు డొనాల్డ్ ట్రంప్ సంచలన నిర్ణయం తీసుకున్నారు. ఇరాన్‌తో చర్చల్లో “గొప్ప పురోగతి” లభించిందని ప్రకటిస్తూ.. హార్ముజ్ జలసంధిలో ఉద్రిక్తతలకు కేంద్రబిందువుగా మారిన “ప్రాజెక్ట్ ఫ్రీడమ్”ను తాత్కాలికంగా నిలిపివేస్తున్నట్లు ఆయన ప్రకటించారు. యుద్ధ మేఘాలు కమ్ముకున్న వేళ శాంతి వైపు ఒక అడుగు పడటం ప్రపంచవ్యాప్తంగా పెను మార్పులకు కారణమవుతోంది..గత కొద్ది కాలంగా ఇరాన్ – అమెరికా మధ్య ఉద్రిక్తతలు పరాకాష్టకు చేరాయి. ఈ క్రమంలోనే పర్షియన్ గల్ఫ్ ప్రాంతంలో చిక్కుకుపోయిన వేలాది మంది విదేశీ పౌరులను, వందలాది నౌకలను రక్షించడానికి అమెరికా “Project Freedom”ను చేపట్టింది. సోమవారం ప్రారంభమైన ఈ ఆపరేషన్, ప్రపంచ చమురు రవాణాలో అత్యంత కీలకమైన హార్ముజ్ జలసంధిని రణరంగంగా మార్చింది. అయితే, పాకిస్తాన్ వంటి స్నేహపూర్వక దేశాల అభ్యర్థన మేరకు, అలాగే ఇరాన్ ప్రతినిధులతో ఒక “పూర్తి, తుది ఒప్పందం” దిశగా అడుగులు పడుతున్న తరుణంలో, ట్రంప్ ఈ ఆపరేషన్‌కు విరామం ప్రకటించారు. “మేము పరస్పరం ఒక అంగీకారానికి వచ్చాం. ఈ విరామం ఒప్పందంపై సంతకం చేయడానికి మార్గం సుగమం చేస్తుంది” అని ఆయన తన ట్రూత్ సోషల్ వేదికగా వెల్లడించారు.షింగ్టన్ నుండి సానుకూల సంకేతాలు వెలువడుతున్నప్పటికీ.. ఇరాన్ రాజధాని టెహ్రాన్ నుండి ఇంకా ఎటువంటి అధికారిక స్పందన రాలేదు. బుధవారం తెల్లవారుజాము కావడంతో ఇరాన్ పాలకులు ఈ పరిణామాలను నిశితంగా గమనిస్తున్నారు. “ప్రాజెక్ట్ ఫ్రీడమ్” అమలులో ఉన్నప్పుడు ఇరాన్ చిన్న పడవలు ధ్వంసం కావడం, యూఏఈ వంటి దేశాలు ఇరాన్‌పై ఆరోపణలు చేయడం వంటి సంఘటనల నేపథ్యంలో, ఇరాన్ ఈ చర్చలను ఎంతవరకు విశ్వసిస్తుందన్నది ఆసక్తికరంగా మారింది.
క్లుప్తంగా చూసినట్లయితే హార్ముజ్ జలసంధిలో నిలిచిపోయిన యుద్ధ నౌకలు, చర్చల టేబుల్ వద్దకు చేరుతున్న దౌత్యవేత్తలు ఒక కొత్త శకానికి నాంది పలుకుతున్నారు. ట్రంప్ ప్రకటించిన ఈ “విరామం” నిజంగానే శాంతి ఒప్పందానికి దారితీస్తుందా లేదా అనేది రాబోయే కొద్ది రోజుల్లో తేలనుంది. ఏది ఏమైనప్పటికీ, చమురు ధరలు తగ్గడం, చర్చల దిశగా అడుగులు పడటం ప్రస్తుతానికి ప్రపంచానికి ఒక శుభ పరిణామంగా చెప్పవచ్చు.
