హోలీ సందర్భంగా హైదరాబాద్‌లో పోలీసుల ఆంక్షలు
14న ఉదయం 6 గంటల నుంచి 15న ఉదయం 6 గంటల వరకు ఆంక్షలు
రోడ్డు మీద వెళ్లేవారిపై రంగులు చల్లితే కఠిన చర్యలు
రోడ్లపై గుంపులుగా ర్యాలీలు నిర్వహించొద్దన్న సీపీ..
నిబంధనలు అతిక్రమిస్తే చర్యలు తప్పవన్న సీపీ అవినాష్ మహంతి..
శుక్రవారం (మార్చి 14వ తేదీన) రోజున ఉదయం 6 గంటల నుంచి తర్వాతి రోజు అంటే మార్చి 15వ తేదీ ఉదయం 6 గంటల వరకు ఆంక్షలు అమల్లో ఉంటాయని పోలీసులు వెల్లడించారు. హోలీ పేరుతో.. రోడ్డు మీద వెళ్లే సంబంధంలేని వారిపై రంగులు చల్లితే కఠిన చర్యలు ఉంటాయని పోలీసులు హెచ్చరించారు. అంతేకాదు.. రోడ్లపై గుంపులు గుంపులుగా ర్యాలీలు నిర్వహించొద్దని కూడా సూచించారు. మద్యం సేవించి రోడ్లపై న్యూసెన్స్ క్రియేట్ చేసినా కఠినంగా వ్యవహరించాల్సి ఉంటుందని తెలిపారు. పండుగ రోజున నిబంధనలు అతిక్రమిస్తే కఠిన చర్యలు తీసుకుంటామని సీపీ అవినాష్ మహంతి హెచ్చరించారు.
మరోవైపు హోలీ రంగులతో ఇబ్బందిపడే వారు ఇంట్లోనే ఉండాలని.. బయటకు వచ్చేవారికి విశాల దృక్పథం కలిగి ఉండాలన్నారు. ఇదిలా ఉంటే.. ప్రస్తుతం రంజాన్ మాసం కూడా నడుస్తుండటం, అందులోనూ శుక్రవారం రోజే హోలీ పండుగ కూడా వస్తుండటంతో.. నగరంలో ఎలాంటి అవాంఛనీయ ఘటనలు జరగకుండా ఉండేందుకు పోలీసులు ఈ నిర్ణయం తీసుకున్నట్లు తెలుస్తోంది. హోలీ వేళ రోడ్ల మీద తిరిగే వారిపై చాలా మంది ఆకతాయిలు రంగులు చల్లుతుంటారు. అయితే.. రంజాన్ మాసం.. అందులో శుక్రవారం కావడం వల్ల ఆరోజున ముస్లింలు చాలా నిష్టగా ఉంటారు. ఈ క్రమంలో అలాంటి పనులు ఎవరైనా చేస్తే గొడవలు జరిగే ప్రమాదాలుండటంతో.. ముందు జాగ్రత్తగా పోలీసులు ఆంక్షలు విధించినట్టు తెలుస్తోంది..
