పాకిస్థాన్ వీధుల్లో మాసిన గెడ్డం, చినిగిన దుప్పటితో బిచ్చగాడి వేషంలో రహస్యాలను బట్టబయలుచేసిన భారత గూఢచారి…!
పాకిస్థాన్ వీధుల్లో మాసిన గెడ్డం, చినిగిన దుప్పటితో బిచ్చగాడి వేషంలో 1980వ దశకంలో ఒకటి రెండు కాదు ఆరేళ్ల పాటు తిరుగుతూ దాయాది అణు రహస్యాలను బట్టబయలు చేశారు భారత గూఢచారి…ఆయన ఎవరో కాదు ప్రస్తుత భారత జాతీయ భద్రతా సలహాదారు అజిత్ దోవల్. భారత్ అణు పరీక్షల తర్వాత పాకిస్థాన్ అణ్వస్త్ర సాధనలో దూకుడుగా వ్యవహరించింది. చైనా వంటి దేశాల మద్దతుతో ఎలాగైనా అణ్వాయుధాలను సంపాదించాలనే పట్టుదలతో దాయాది ముందుకు సాగింది. దీంతో పాక్ అణు రహస్యాన్ని బయటపెట్టే బాధ్యతను సూపర్ కాప్‌గా గుర్తింపు పొందిన అజిత్ దోవల్‌కు నాటి భారత ప్రభుత్వం అప్పగించింది.
ఈ ఆపరేషన్‌లో భాగంగా పాక్ రాజధాని ఇస్లామాబాద్‌కు చేరుకున్న అజిత్ దోవల్.. భిచ్చగాడి వేషంలో తలదాచుకున్నారు. ఒంటిపై చిరిగిన దుప్పటి, నెరసిన జుట్టు, మాసిన గెడ్డంతో చూసేవారికి దయ, జాలికోసం చేతులు చాచే అభాగ్యుడిలా కనిపించేవారు. కానీ ఆ వేషం వెనుక ఒక ముఖ్యమైన గూఢచారి, అత్యంత చురుకైన మేధావి దాగి ఉన్నారు.
భారత ప్రభుత్వం అమెరికా ఆంక్షలను సైతం బేఖాతరు చేస్తూ 1974లో మొదటిసారి అణు పరీక్షలను నిర్వహించింది. దీంతో దాయాది తాము కూడా ఎలాగైనా అణు బాంబును సమకూర్చుకోవాలని భావించింది. ఇందుకోసం దూకుడుగా వ్యవహరిస్తూ.. చైనా వంటి దేశాల మద్దతుతో ముందుకు సాగింది. ఈ రహస్య ప్రయత్నాలను కనిపెట్టే బాధ్యతను అజిత్ దోవల్‌కు అప్పగించింది.
ఇస్లామాబాద్‌ సమీపంలోని ఖహూటా బయటకు మాత్రం ఓ సాధారణ పట్టణం. కానీ, అక్కడి ఖాన్ రిసెర్చ్ ల్యాబొరేటరీస్ (KRL)లోనే పాక్ అణు పరిశోధనలు సాగించింది. దేశాల విధిని మార్చగలిగే రహస్యాలను కాపాడుకోడానికి అక్కడ శాస్త్రవేత్తలు, భద్రతా సిబ్బంది, ప్రభుత్వ అధికారులు కఠినమైన నిబంధనలు అనుసరించేవారు. ఒక చిన్న పొరపాటు జరిగితేనే రహస్యాలన్నీ బయటపడే ప్రమాదం ఉంది. అయితే, ఆ వాతావరణంలో కలిసిపోయిన దోవల్.. ఆరేళ్ల పాటు వీధుల్లో బిచ్చగాడిలా తిరుగుతూ, గమనిస్తూ, ప్రతి చిన్న కదలికను జ్ఞాపకం చేసుకుంటూ గూఢచర్యం కొనసాగించారు.
ఈ ఆపరేషన్‌లో దోవల్‌కు నిజమైన బ్రేక్‌థ్రూ ఒక చిన్న సెలూన్ దుకాణంలో దొరికింది. ఆ సెలూన్‌కు కేఆర్ఎల్ శాస్త్రవేత్తలు తరచూ వచ్చి క్షవరం చేయించుకునేవారు. వారి జుట్టును ఎవరికీ తెలియకుండా దోవల్ జాగ్రత్తగా సేకరించి నమూనాలను భారత్‌కు పంపారు. దీనిని ల్యాబ్‌లో పరీక్షించగా యురేనియం, రేడియేషన్ ఆనవాళ్లు బయటపడ్డాయి. దీంతో పాకిస్థాన్ అణ్వస్త్ర తయారీ దిశగా అడుగులు వేస్తున్నట్టు భారత్‌కు స్పష్టమైంది. ఈ గూఢచర్య సమాచారంతో భారత తన జాతీయ భద్రతా వ్యూహాన్ని మార్చుకుంది. విశ్లేషకుల అంచనాల ప్రకారం.. దోవల్ ప్రయత్నాల వల్లే పాకిస్థాన్ అణు సామర్థ్య పరీక్షలు దాదాపు 15 ఏళ్లు ఆలస్యమయ్యాయి.
ఈ ఆపరేషన్ ఒక్కరోజు, ఒక్క ఏడాదితో ముగిసిపోలేదు. ఏకంగా ఆరేళ్ల పాటు దోవల్ ప్రాణాలను అరచేతుల్లో పెట్టుకుని దినదిన గండంతో గడిపారు. ఒకవేళ పాక్ అధికారులు గుర్తిస్తే కేవలం ఆయనకే కాదు భారత భద్రత కూడా ప్రమాదంలో పడేది..
