క్యాన్సర్ పై ఒక చారిత్రాత్మక విజయాన్ని నమోదు.. అమెరికా శాస్త్రవేత్తల ‘యూనివర్సల్ వ్యాక్సిన్’ సంచలనం.!
క్యాన్సర్ రహిత ప్రపంచాన్ని ఆవిష్కరించే దిశగా అమెరికా శాస్త్రవేత్తలు ఒక చారిత్రాత్మక విజయాన్ని నమోదు చేశారు. ప్రాణాంతకమైన వివిధ రకాల క్యాన్సర్లను సమర్థవంతంగా ఎదుర్కోగల ఒక ‘యూనివర్సల్ వ్యాక్సిన్’ను వారు అభివృద్ధి చేశారు…ఇటీవల ఎలుకలపై జరిపిన ప్రయోగాల్లో ఈ టీకా అద్భుతమైన ఫలితాలను ఇచ్చింది. కేవలం ఒకే ఒక ఇంజెక్షన్‌తో వేర్వేరు రకాల క్యాన్సర్ కణాల పెరుగుదలను అడ్డుకోవడం సాధ్యమని ఈ పరిశోధన ద్వారా తేలింది. వైద్య రంగంలో ఇదొక విప్లవాత్మక మార్పుగా శాస్త్రవేత్తలు భావిస్తున్నారు.
ఈ వ్యాక్సిన్ తయారీలో అత్యాధునిక ‘నానోపార్టికల్’ సాంకేతికతను ఉపయోగించారు. ప్రయోగశాలలో ట్యూమర్లతో ఉన్న ఎలుకలకు ఈ టీకాను అందించగా, దాదాపు 88 శాతం ఎలుకలు ప్రాణాంతక క్యాన్సర్ల నుండి పూర్తిగా కోలుకున్నాయి. ఇది శరీరంలోని సహజ రోగనిరోధక వ్యవస్థను శక్తివంతం చేసి, క్యాన్సర్ కణాలను గుర్తించేలా చేస్తుంది. సాధారణ కణాలకు ఎటువంటి హాని కలగకుండా, కేవలం హానికరమైన ట్యూమర్ కణాలను మాత్రమే ఈ వ్యాక్సిన్ లక్ష్యంగా చేసుకుని నాశనం చేయడం దీని ప్రత్యేకత.
ఈ నానోపార్టికల్ టీకా కేవలం ఉన్న ట్యూమర్లను తగ్గించడమే కాకుండా, భవిష్యత్తులో క్యాన్సర్ మళ్లీ తిరిగి రాకుండా రక్షణ కవచంలా పనిచేస్తుంది. శరీరంలోని ఒక భాగం నుండి ఇతర భాగాలకు క్యాన్సర్ కణాలు వ్యాపించే ‘మెటాస్టాసిస్’ ప్రక్రియను కూడా ఇది సమర్థవంతంగా అడ్డుకుంటుంది. దీనివల్ల రోగుల్లో ప్రాణాపాయం తగ్గి, కోలుకునే అవకాశాలు మెరుగవుతాయి. రోగనిరోధక కణాలకు ఈ వ్యాక్సిన్ ఒక రకమైన ‘శిక్షణ’నిచ్చి, క్యాన్సర్ కణాలు ఎప్పుడు కనిపించినా వాటిని అంతం చేసేలా సిద్ధం చేస్తుంది.
ఎలుకలపై జరిపిన ప్రయోగాలు విజయవంతం కావడంతో, త్వరలోనే ఈ వ్యాక్సిన్‌ను మనుషులపై పరీక్షించేందుకు (హ్యూమన్ క్లినికల్ ట్రయల్స్) శాస్త్రవేత్తలు సన్నాహాలు చేస్తున్నారు. ఒకవేళ ఈ పరీక్షలు కూడా ఆశించిన ఫలితాలను ఇస్తే, ప్రపంచవ్యాప్తంగా లక్షలాది మంది ప్రాణాలను కాపాడవచ్చు. కీమోథెరపీ వంటి కఠినమైన చికిత్సల అవసరం లేకుండానే, ఒక చిన్న ఇంజెక్షన్‌తో క్యాన్సర్‌ను జయించే రోజులు దగ్గరలోనే ఉన్నాయని వైద్య నిపుణులు ఆశాభావం వ్యక్తం చేస్తున్నారు..
