తృణమూల్ కాంగ్రెస్ కు పశ్చిమ బెంగాల్‌లో మరో భారీ షాక్..మాజీ మంత్రి సుజిత్ బోస్ అరెస్టు…!
తృణమూల్ కాంగ్రెస్ కు పశ్చిమ బెంగాల్‌లో మరో భారీ షాక్ తగిలింది. ఆ పార్టీ ముఖ్య నేత, మాజీ మంత్రి సుజిత్ బోస్ ను ఎన్‌ఫోర్స్‌మెంట్ డైరెక్టరేట్ (ఈడీ) అధికారులు అరెస్టు చేశారు. .
మున్సిపాలిటీ నియామకాల కుంభకోణానికి సంబంధించిన మనీలాండరింగ్ విచారణలో భాగంగా పశ్చిమ బెంగాల్ మాజీ మంత్రి, టీఎంసీ నాయకుడు సుజిత్ బోస్‌ను ఎన్‌ఫోర్స్‌మెంట్ డైరెక్టరేట్ అరెస్టు చేసింది. ఒక రోజు విచారణ అనంతరం ఈ అరెస్టు జరిగింది. ఈ విచారణలో అధికారులు ఆయనకు ఆధారాలు చూపించి అదుపులోకి తీసుకున్నారు. పశ్చిమ బెంగాల్ వ్యాప్తంగా మున్సిపల్ నియామకాలలో జరిగిన భారీ అవకతవకలపై కలకత్తా హైకోర్టు ఆదేశాల మేరకు సీబీఐ దాఖలు చేసిన ఎఫ్‌ఐఆర్ ఆధారంగా ఈ కేసు నమోదైంది. అంతకుముందు, అక్టోబర్ 10, 2025న బోస్ కార్యాలయం, నివాసంతో సహా 13 ప్రాంతాలపై దాడులు జరిపి, పత్రాలు, ₹45 లక్షల నగదును స్వాధీనం చేసుకున్నారు. ఈ విచారణలో, తారుమారు చేయబడిన ఓఎంఆర్ షీట్లు, పలు మున్సిపల్ సంస్థలలో అక్రమ నియామకాలతో కూడిన విస్తృత నియామకాల కుంభకోణానికి కూడా సంబంధాలు ఉన్నట్లు గుర్తించారు..
మున్సిపల్ రిక్రూట్‌మెంట్‌ కుంభకోణం కేసులో దాదాపు ఏడు గంటల పాటు విచారణ జరిపిన అనంతరం ఆయనను అదుపులోకి తీసుకున్నారు. మమతా బెనర్జీ ప్రభుత్వ హయాంలో సుజిత్ బోస్ ఫైర్‌ సర్వీసెస్‌ మంత్రిగా పనిచేశారు.
ఈ కేసులో సుజిత్ బోస్ కుమారుడు సముద్ర బోస్‌కు కూడా ఈడీ సమన్లు జారీ చేసింది. బెంగాల్‌లో అధికార మార్పిడి జరిగిన తర్వాత టీఎంసీకి చెందిన కీలక నేత అరెస్టు కావడం ఇదే తొలిసారి. ఇటీవల జరిగిన అసెంబ్లీ ఎన్నికల్లో టీఎంసీపై వచ్చిన అవినీతి ఆరోపణలను ప్రధాన ప్రచార అంశంగా మార్చిన బీజేపీ ఘన విజయం సాధించింది. ప్రధాని నరేంద్ర మోదీ, కేంద్ర హోంమంత్రి అమిత్ షా లు టీఎంసీ అవినీతి అంశాన్ని ప్రజల్లోకి బలంగా తీసుకెళ్లారు.
