శ్రీశైలం, సాగర్, జూరాలలో కనీస నీటి మట్టానికి ఎగువన 146.55 టీఎంసీలు లభ్యత
అందులో ఏపీ వాటా 115.7 టీఎంసీలు..
శ్రీశైలం, సాగర్‌లో 146.55 టీఎంసీలు.. ఏపీకి 115.70, తెలంగాణకు 30.85 టీఎంసీలు
కృష్ణా నదీ పరివాహక ప్రాంతంలోని శ్రీశైలం, నాగార్జునసాగర్ జలాశయాల్లో కనీస నీటి మట్టానికి ఎగువన 146.55 టీఎంసీల నీరు అందుబాటులో ఉందని ఏపీ ప్రభుత్వం తెలిపింది. ఇందులో తమ రాష్ట్రానికి 70 శాతం వాటా ప్రకారం 115.70 టీఎంసీలు, తెలంగాణకు 30 శాతం వాటా ప్రకారం 30.85 టీఎంసీలు లభిస్తాయని పేర్కొంది.
ఇప్పటి వరకు ఏపీ 13.62 టీఎంసీలు, తెలంగాణ 20.06 టీఎంసీల నీటిని వినియోగించుకున్నాయని రాష్ట్ర జలవనరుల శాఖ తెలిపింది. మిగిలిన నీటిని కూడా ఇదే నిష్పత్తిలో రాష్ట్రాల వాటాల ప్రకారం పరిగణించాలని కోరుతూ ఏపీ జలవనరుల శాఖ ఈఎన్‌సీ కె. నరసింహమూర్తి కృష్ణా బోర్డు చైర్మన్‌కు లేఖ రాశారు.
అక్టోబర్ 31 వరకు 47 టీఎంసీలు ఇవ్వాలని విజ్ఞప్తి
ఈ ఏడాది రాష్ట్రంలో కరువు పరిస్థితులు ఉన్నందున తాగునీటి అవసరాలకు అత్యధిక ప్రాధాన్యం ఇవ్వాలని ఏపీ ప్రభుత్వం కోరింది. అక్టోబర్ 31 వరకు రాష్ట్ర తాగునీటి అవసరాల కోసం 47 టీఎంసీల నీటిని కేటాయించాలని కృష్ణా బోర్డుకు విజ్ఞప్తి చేసింది.
మరోవైపు ఏపీ, తెలంగాణ మధ్య కృష్ణా జలాల వాటాల పంపిణీ అంశం కృష్ణా ట్రిబ్యునల్-2లో ఇంకా పరిష్కారం కాలేదు. ఈ నేపథ్యంలో తాత్కాలికంగా ఏపీకి 66 శాతం, తెలంగాణకు 34 శాతం నీటిని సర్దుబాటు చేయాలనే నిర్ణయం గతంలో తీసుకున్నట్లు ఏపీ ప్రభుత్వం పేర్కొంది.
