రష్యా–బ్రిటన్ మధ్య మాటల యుద్ధం..
ఉక్రెయిన్‌లో క్షిపణి ప్లాంట్లపై రష్యా హెచ్చరిక
బ్రిటన్‌పై రష్యా తీవ్రస్థాయిలో మండిపడింది. ఉక్రెయిన్‌లో శాంతి ప్రక్రియకు బ్రిటన్ అడ్డంకులు సృష్టిస్తోందని క్రెమ్లిన్ తీవ్ర ఆరోపణలు చేసింది. ఉక్రెయిన్‌లోనే SCALP సుదూర క్రూయిజ్ క్షిపణుల తయారీకి అవసరమైన సాంకేతిక సమాచారాన్ని కీవ్‌కు అందించేందుకు బ్రిటన్ చర్యలు చేపడుతున్న నేపథ్యంలో రష్యా ఈ హెచ్చరికలు జారీ చేసింది..
ఉక్రెయిన్‌లో ఇలాంటి క్షిపణులు, ఇతర సైనిక పరికరాల తయారీ కేంద్రాలను గుర్తించి ధ్వంసం చేసేందుకు తమ సైనిక దళాలు అవసరమైన నిఘా సమాచారాన్ని సేకరిస్తున్నాయని క్రెమ్లిన్ ప్రతినిధి డిమిత్రి పెస్కోవ్ తెలిపారు. బ్రిటన్ నిరంతరం “మంటలకు నూనె పోస్తోందని” ఆయన తీవ్ర వ్యాఖ్యలు చేశారు.
ఉక్రెయిన్‌కు బ్రిటన్ తన సైనిక మద్దతును మరింత బలోపేతం చేస్తామని బ్రిటన్ ప్రధాని ఆండీ బర్న్‌హామ్ కీవ్ పర్యటనలో హామీ ఇచ్చిన నేపథ్యంలో రష్యా స్పందించింది.
SCALP క్షిపణి సుమారు 250 కిలోమీటర్ల దూరంలోని లక్ష్యాలను ఛేదించగల సుదూర క్రూయిజ్ క్షిపణి. రష్యా–ఉక్రెయిన్ యుద్ధం ప్రారంభమైన తర్వాత ఫ్రాన్స్, బ్రిటన్‌లు ఉక్రెయిన్‌కు ఈ తరహా క్షిపణులను అందిస్తున్నాయి.
కాగా, ఉక్రెయిన్‌లోనే SCALP క్షిపణుల ఉత్పత్తికి అవసరమైన సహకారం అందించే దిశగా బ్రిటన్ చర్యలు చేపడుతోంది. ఫ్రాంకో–బ్రిటిష్ క్షిపణిలో ఉపయోగించే బ్రిటన్‌కు చెందిన భాగాలకు సంబంధించిన సాంకేతిక సమాచారాన్ని రక్షణ సంస్థ MBDA ఉక్రెయిన్‌కు అందించేందుకు బ్రిటన్ ప్రభుత్వం అనుమతించనున్నట్లు సమాచారం.
కీవ్‌లో బ్రిటన్ ప్రధాని
బ్రిటన్ ప్రధాని ఆండీ బర్న్‌హామ్ సోమవారం కీవ్‌ను సందర్శించి ఉక్రెయిన్ స్వాతంత్ర్య దినోత్సవ కార్యక్రమాల్లో పాల్గొన్నారు. ఈ సందర్భంగా రష్యా నుంచి వస్తున్న బెదిరింపులు ఉన్నప్పటికీ ఉక్రెయిన్‌కు బ్రిటన్ సైనిక మద్దతు కొనసాగుతుందని ఆయన స్పష్టం చేశారు.
రష్యా–ఉక్రెయిన్ మధ్య ఇప్పటికే దాడులు తీవ్రస్థాయికి చేరుకున్నాయి. ఇరుదేశాలు క్షిపణి, డ్రోన్ దాడులతో పరస్పరం విరుచుకుపడుతుండటంతో సామాన్య పౌరులు తీవ్రంగా నష్టపోతున్నారు. తాజా పరిణామాలతో రష్యా–బ్రిటన్ మధ్య కూడా ఉద్రిక్తత మరింత పెరిగే అవకాశాలు కనిపిస్తున్నాయి.
