నీళ్లు ఇవ్వలేము యాసంగిలో వరి పంట వేయకండి– రేవంత్ రెడ్డి
తెలంగాణలో ఎల్‌నినో ప్రభావంతో రానున్న నెలల్లో నీరు, విద్యుత్‌ కొరత తీవ్రతరం అయ్యే అవకాశాలున్నాయని ముఖ్యమంత్రి రేవంత్‌రెడ్డి తీవ్ర హెచ్చరికలు చేయడం ప్రస్తుతం తీవ్ర ఆందోళనకు గురి చేస్తోంది. ఇప్పటి నుంచే ప్రజలు, రైతులు అప్రమత్తంగా ఉండాలని.. సీఎం ముందు జాగ్రత్త చర్యలు చెప్పారు. అందుబాటులో ఉన్న నీటిని పొదుపుగా వినియోగించాలని హితవు పలికారు. మరీ ముఖ్యంగా యాసంగి సీజన్‌లో రైతులు వరి సాగుకు దూరంగా ఉండి.. తక్కువ నీటితో పండే ఆరుతడి పంటల వైపు మొగ్గు చూపాలని కీలక విజ్ఞప్తి చేశారు. రాష్ట్రంలోని జలాశయాల్లో నీటి నిల్వలు తగ్గడం.. విద్యుత్‌ డిమాండ్‌ పెరగడం తీవ్ర ఆందోళన కలిగిస్తున్నాయని తెలిపారు.
ఎల్‌నినో పరిస్థితులపై మంత్రులతో సమీక్షించిన తర్వాత సచివాలయంలో మీడియాతో మాట్లాడిన సీఎం రేవంత్ రెడ్డి కీలక వ్యాఖ్యలు చేశారు. రాష్ట్రంలో నీటి లభ్యతపై కీలక వివరాలు వెల్లడించారు. గత ఏడాది ఇదే సమయంలో రాష్ట్రంలోని అన్ని ప్రధాన రిజర్వాయర్లలో కలిపి 400 టీఎంసీలకు పైగా నీరు అందుబాటులో ఉండగా.. ప్రస్తుతం నీటి నిల్వలు గణనీయంగా తగ్గాయని తెలిపారు. అందుబాటులో ఉన్న నీటిని తాగునీటి అవసరాలకు ప్రాధాన్యమిస్తూ వినియోగించాల్సిన పరిస్థితి ఉందని చెప్పారు. హైదరాబాద్‌కు తాగునీరు అందించే జలాశయాల్లోనూ నీటి మట్టాలు తగ్గుతున్నాయని సీఎం గుర్తు చేశారు. వచ్చే కొన్ని నెలలు రాష్ట్రానికి అత్యంత కీలకమని.. తిరిగి వర్షాలు కురిసే వరకు ప్రజలు జాగ్రత్తగా వ్యవహరించాలని సూచించారు. నీటిని వృథా చేయకుండా వినియోగించడం ప్రతి ఒక్కరి బాధ్యత అని స్పష్టం చేశారు.
రాష్ట్రంలో అధిక ఉష్ణోగ్రతల కారణంగా విద్యుత్‌ వినియోగం గణనీయంగా పెరిగిందని ముఖ్యమంత్రి రేవంత్ రెడ్డి వెల్లడించారు. సాధారణ స్థాయితో పోలిస్తే అదనంగా సుమారు 5 వేల మెగావాట్ల విద్యుత్‌ డిమాండ్‌ పెరిగినట్లు తెలిపారు. అక్టోబర్‌లోనే వేసవిని తలపించే స్థాయిలో విద్యుత్‌ వినియోగం నమోదవడం అసాధారణమని పేర్కొన్నారు. రైతులు, పరిశ్రమలకు విద్యుత్‌ సరఫరాలో ఇబ్బందులు తలెత్తకుండా తమ ప్రభుత్వం అన్ని రకాల ప్రయత్నాలు చేస్తోందని చెప్పారు. అవసరమైన విద్యుత్‌ను మార్కెట్‌లో అందుబాటులో ఉన్న ధరకు కొనుగోలు చేసేందుకు సిద్ధంగా ఉన్నామని తెలిపారు.
