మరో చిన్నారి ప్రాణం బలిగొన్న చైనా మాంజ
హైదరాబాద్ – కూకట్‌పల్లి పోలీస్ స్టేషన్ పరిధిలో చైనా మాంజతో పాప మృతి
ద్విచక్ర వాహనంపై వెళ్తుండగా వివేకానంద నగర్ సమీపంలో ఘటన
పాప ఒక్కసారిగా అరవడంతో ఆపి చూడగా గొంతుకు మాంజ చిక్కుకున్నట్లు గుర్తింపు
తీవ్ర రక్తస్రావం జరగడంతో నిష్విక ఆదిత్య (5)ను సమీప ఆసుపత్రికి తరలింపు.. అప్పటికే మృతి చెందినట్లు తెలిపిన డాక్టర్లు..
సరదాగా ఎగురవేసే పతంగి దారం ఒక నిండు ప్రాణాన్ని బలి తీసుకుంటుందని ఆ తండ్రి ఊహించలేదు. కూకట్‌పల్లి పోలీస్ స్టేషన్ పరిధిలోని వివేకానంద నగర్ వద్ద జరిగిన ఒక విషాద ఘటనలో ఐదేళ్ల చిన్నారి నిష్విక దరియా ప్రాణాలు కోల్పోయింది. సంక్రాంతి పండుగ వేళ వాడే నిషేధిత చైనా మాంజా ఒక పచ్చని కుటుంబంలో తీరని శోకాన్ని నింపింది…
డాక్టర్ అంబేద్కర్ కోనసీమ జిల్లా అంబాజీపేట గ్రామానికి చెందిన రామసాగర్ తన కుటుంబంతో కలిసి నగరంలోని కేపీహెచ్‌బీ గోకుల్ ప్లాట్స్‌లో నివసిస్తున్నారు. వీరు పఠాన్ చెరువు సమీపంలోని ఖాజీపల్లిలో కొత్తగా ఒక ఇల్లు తీసుకున్నారు. అక్కడ జరుగుతున్న ఇంటీరియర్ పనులను చూసుకుని, తండ్రీకూతుళ్లు ఇద్దరూ బైక్‌పై తిరిగి వస్తుండగా ఈ ప్రమాదం జరిగింది. దారిలో ఓ నగల దుకాణానికి వెళ్దామని మెయిన్ రోడ్డు మీదుగా యూటర్న్ తీసుకుంటున్న సమయంలో.. గాలిలో వేలాడుతున్న చైనా మాంజా ఒక్కసారిగా చిన్నారి నిష్విక గొంతుకు చుట్టుకుంది.
మాంజా గొంతులో దిగబడటంతో పాప బిగ్గరగా కేకలు వేసింది. తండ్రి వెంటనే బైక్ ఆపి చూసేసరికి చిన్నారి గొంతు నుండి తీవ్రంగా రక్తస్రావం అవుతోంది. హుటాహుటిన సమీపంలోని ఆసుపత్రికి తరలించినప్పటికీ.. అప్పటికే పాప మరణించినట్లు వైద్యులు ధృవీకరించారు. కళ్ల ముందే తన కూతురు విగతజీవిగా మారడంతో రామసాగర్ దంపతులు కన్నీరుమున్నీరవుతున్నారు. పోలీసులు కేసు నమోదు చేసి పాప మృతదేహాన్ని పోస్టుమార్టం నిమిత్తం గాంధీ ఆసుపత్రికి తరలించారు.
తండ్రి కళ్లముందే కూతురు మృతి.. చైనా మాంజాకు మరో చిన్నారి బలి..
ప్రాణాలు తీస్తున్న గ్లాస్ కోటింగ్ మాంజా..
సాధారణ కాటన్ దారాలకు బదులు నైలాన్ లేదా సింథటిక్ దారాలకు గాజు పొడి, ప్లాస్టిక్ కలిపి ఈ చైనా మాంజాను తయారు చేస్తారు. ఇది ఎంత గట్టిగా ఉంటుందంటే.. గాలిలో వేలాడుతున్నప్పుడు బైక్ వేగానికి తగిలితే కత్తిలా కోసుకుపోతుంది. పతంగి తెగిన తర్వాత ఈ దారాలు చెట్లకు, విద్యుత్ తీగలకు చిక్కుకుని గాలిలో వేలాడుతుంటాయి. వీటిని గమనించని వాహనదారులు, ముఖ్యంగా బైక్‌లపై వెళ్లే వారు ప్రమాదాల బారిన పడుతున్నారు.
హైదరాబాద్ నగరంలో ఇలాంటి ఘటనలు గతంలోనూ జరిగాయి. ప్రభుత్వం చైనా మాంజాను నిషేధించినప్పటికీ.. కొందరు రహస్యంగా విక్రయించడం వల్లే ఇలాంటి అకాల మరణాలు సంభవిస్తున్నాయి. పతంగి వేడుకలు జరుపుకునే వారు ఇతరుల ప్రాణాలకు ముప్పు కలగకుండా జాగ్రత్త వహించాలని అధికారులు హెచ్చరిస్తున్నారు.
