వరంగల్ వేదికగా సాగుతున్న రాజకీయ పోరాటంలో భాగంగా, కాంగ్రెస్ పార్టీ ప్రకటించిన ‘రైతు డిక్లరేషన్’పై బీఆర్ఎస్ వర్కింగ్ ప్రెసిడెంట్ కేటీఆర్ నిప్పులు చెరిగారు..వరంగల్‌లో బీఆర్ఎస్ ఆధ్వర్యంలో అత్యంత ప్రతిష్టాత్మకంగా నిర్వహించిన ‘రైతు సంగ్రామ సదస్సు’కు ఆయన ముఖ్య అతిథిగా హాజరయ్యారు. ఈ సందర్భంగా కేటీఆర్ మాట్లాడుతూ, వరంగల్ నగరాన్ని కాకతీయుల పౌరుషానికి నిదర్శనమైన గడ్డగా అభివర్ణించారు. చారిత్రాత్మక నేపథ్యం ఉన్న ఈ నగరం నుంచి పోరాటాల విల్లు ఎక్కుపెడితే, రైతన్నలకు ద్రోహం చేసిన వారి గుండెలు భయంతో వణుకుతాయని ఆయన ఘాటు వ్యాఖ్యలు చేశారు.
ఈ సదస్సు ప్రధాన ఉద్దేశం కాంగ్రెస్ ప్రభుత్వం రైతులకు చేసిన మోసాలను సాక్ష్యాధారాలతో సహా ఎండగట్టడమేనని కేటీఆర్ స్పష్టం చేశారు. దాదాపు నాలుగేళ్ల క్రితం ఇదే వరంగల్ గడ్డపై కాంగ్రెస్ అగ్రనేతలు భారీ బహిరంగ సభను ఏర్పాటు చేసి ‘రైతు డిక్లరేషన్’ పేరిట అనేక వాగ్దానాలు చేశారని ఆయన గుర్తు చేశారు. గత ఆరు దశాబ్దాల పాటు అధికారంలో ఉండి రైతుల రక్తం తాగిన కాంగ్రెస్ పార్టీ, ఎన్నికల సమయంలో మాత్రం ‘కొంగజపం’ చేస్తూ మాయమాటలతో అధికారాన్ని చేజిక్కించుకుందని ఆయన విమర్శించారు. రైతు డిక్లరేషన్‌లో పొందుపరిచిన 34 హామీలు ఇప్పుడు ఏ గాలిలో కలిసిపోయాయని ఆయన సూటిగా ప్రశ్నించారు.
కాంగ్రెస్ ప్రభుత్వంపై తన విమర్శలను మరింత ఉధృతం చేస్తూ, రైతు డిక్లరేషన్ అనేది కేవలం ఒక బోగస్ పత్రమని, అది ప్రజలను వంచించేందుకు రూపొందించిన చిత్తు కాగితమని కేటీఆర్ మండిపడ్డారు. కాంగ్రెస్ ప్రభుత్వం నిర్వహిస్తున్న కార్యక్రమాలు రైతులకు మేలు చేసే ‘మేళాలు’ కావు, అవి కేవలం ‘దగా మేళాలు’ అని ఆయన ఎద్దేవా చేశారు. ఎన్నికల ముందు 100 రోజుల్లోనే అన్ని హామీలను నెరవేరుస్తామని ప్రగల్భాలు పలికి, ఇప్పుడు నెలలు గడుస్తున్నా అతీగతీ లేకపోవడాన్ని ఆయన తప్పుబట్టారు. కాంగ్రెస్ మాటలు నమ్మి ఓట్లు వేసిన అన్నదాతలు నేడు అరిగోస పడుతున్నారని ఆవేదన వ్యక్తం చేశారు.
అధికారంలోకి రాకముందు ముఖ్యమంత్రి రేవంత్ రెడ్డి, రాహుల్ గాంధీలు రైతులకు ఇచ్చిన హామీలను కేటీఆర్ ఈ సందర్భంగా ప్రస్తావించారు. గత కేసీఆర్ ప్రభుత్వం ఎకరాకు రూ. 10 వేల చొప్పున పెట్టుబడి సాయం అందిస్తే, తాము అధికారంలోకి వస్తే రూ. 15 వేలు ఇస్తామని ఆశ చూపిన కాంగ్రెస్, ఇప్పటివరకు పూర్తిస్థాయిలో న్యాయం చేయలేదని ధ్వజమెత్తారు. “దొంగలొస్తున్నారు జాగ్రత్త” అని రాహుల్ గాంధీ, రేవంత్ రెడ్డి ఫోటోలను పోలీస్ స్టేషన్లలో అంటించే పరిస్థితి వచ్చిందని వ్యాఖ్యానించారు. చెడ్డీ గ్యాంగ్ కంటే కాంగ్రెస్ గ్యాంగ్ రాష్ట్రానికి అత్యంత ప్రమాదకరమని ఆయన హెచ్చరించారు.
చివరగా, ముఖ్యమంత్రి రేవంత్ రెడ్డి ఢిల్లీ పర్యటనలపై కేటీఆర్ సెటైర్లు వేశారు. ఇప్పటి వరకు రేవంత్ రెడ్డి 69 సార్లు ఢిల్లీకి వెళ్లారని, కానీ రాష్ట్ర రైతు ప్రయోజనాల కోసం కేంద్రం నుంచి 69 పైసలైనా తెచ్చారా అని నిలదీశారు. రాష్ట్రంలో వడ్ల కొనుగోళ్ల ప్రక్రియలో విపరీతమైన జాప్యం జరుగుతోందని, ఇదే పరిస్థితి కొనసాగితే రైతులు ఆగ్రహంతో కాంగ్రెస్ నాయకులను ఊరూరా తరిమికొట్టే రోజులు దగ్గర్లోనే ఉన్నాయని ఆయన హెచ్చరించారు. రైతులకు న్యాయం జరిగే వరకు బీఆర్ఎస్ పార్టీ విశ్రమించదని, క్షేత్రస్థాయిలో పోరాటాన్ని ఉధృతం చేస్తామని కేటీఆర్ పునరుద్ఘాటించారు.
