మహారాష్ట్రలోని పుణె జిల్లా దౌండ్ తాలూకాలో శుక్రవారం తీవ్ర ఉద్రిక్త పరిస్థితులు నెలకొన్నాయి. యవత్ గ్రామంలోని ఒక మసీదుపై కొందరు వ్యక్తులు కాషాయ జెండాను ఎగురవేయడానికి ప్రయత్నించడంతో రెండు వర్గాల మధ్య తీవ్ర ఘర్షణ చోటుచేసుకుంది. పరిస్థితిని నియంత్రించడానికి పోలీసులు రంగంలోకి దిగి బాష్పవాయు గోళాలను ప్రయోగించాల్సి వచ్చింది. ప్రస్తుతం ఆ ప్రాంతంలో భద్రతా దళాలను భారీగా మోహరించి పరిస్థితిని అదుపులో ఉంచడానికి ప్రయత్నిస్తున్నారు..యవత్ గ్రామం గ్రామీణ ప్రాంతమైనప్పటికీ ఇక్కడ హిందూ, ముస్లిం జనాభా దాదాపు సమాన నిష్పత్తిలో నివసిస్తుంది. మీడియా నివేదికల ప్రకారం.. శుక్రవారం ఉదయం కొందరు యువకులు మసీదు వద్దకు వెళ్లి కాషాయ జెండాను ఎగురవేయడానికి ప్రయత్నించారు. అంతేకాకుండా మసీదు ఆవరణలో విధ్వంసం సృష్టించడానికి కూడా ప్రయత్నించినట్లు ఆరోపణలు ఉన్నాయి. ఈ చర్యతో ఆగ్రహించిన స్థానిక ముస్లిం వర్గం దీనిని తీవ్రంగా ప్రతిఘటించింది. దీంతో రెండు వర్గాల మధ్య తీవ్ర వాగ్వాదం చోటుచేసుకుని అది కాస్తా రాళ్లదాడికి దారితీసింది. పరిస్థితి అదుపు తప్పకుండా చూసేందుకు పోలీసులు వెంటనే రంగ ప్రవేశం చేసి, కొందరు ఆందోళనకారులను అదుపులోకి తీసుకున్నారు..
సోషల్ మీడియా పోస్ట్.. తదనంతర పరిణామాలు
ఈ ఘర్షణకు మూలం ఒక సోషల్ మీడియా పోస్ట్ అని తెలుస్తోంది. శుక్రవారం ఉదయం పుణెలోని దౌండ్ తాలూకా, యవత్ గ్రామానికి చెందిన ఒక వర్గానికి చెందిన యువకుడు సోషల్ మీడియాలో అభ్యంతరకరమైన పోస్టులు చేశాడు. ఈ పోస్టుల విషయం తెలిసి ఇతర వర్గానికి చెందిన ప్రజలు ఆగ్రహం వ్యక్తం చేశారు. మధ్యానం యవత్ ప్రాంతంలోని వారపు సంతను పూర్తిగా మూసివేయించారు. పరిస్థితి మరింత దిగజారి కొందరు ఆందోళనకారులు ఆగ్రహంతో బైకులకు నిప్పుపెట్టారు….. ఇది పూర్తి స్థాయిలో భయబ్రాంతులకు గురిచేసింది…
ఈ ఘటనపై యవత్ పోలీస్ ఇన్‌స్పెక్టర్ నారాయణ్ దేశ్‌ముఖ్ స్పందించారు. అభ్యంతరకర పోస్ట్ చేసిన యువకుడి పేరు సయ్యద్ అని, అతడిని పోలీసులు వెంటనే అదుపులోకి తీసుకున్నారని తెలిపారు. “ప్రస్తుతం గ్రామంలో పరిస్థితి ఉద్రిక్తంగానే ఉంది. ఏదైనా అవాంఛనీయ సంఘటన జరగకుండా నివారించడానికి పెద్ద సంఖ్యలో పోలీసులు మోహరించారు. ప్రజలు సంయమనం పాటించాలని విజ్ఞప్తి చేస్తున్నాము” అని నారాయణ్ దేశ్‌ముఖ్ పేర్కొన్నారు…
దౌండ్ తాలూకాలో ఇలాంటి ఉద్రిక్త పరిస్థితులు రావడం ఇది కొత్త కాదు. గత జులై 26న యవత్‌లోని నీలకంఠేశ్వర ఆలయంలో ఛత్రపతి శివాజీ మహారాజ్ విగ్రహాన్ని అగౌరవపరిచిన ఘటన ఇంకా తాజాగా ఉండగానే, ఈ కొత్త ఘటన ఆ ప్రాంతంలో మత ఘర్షణల ఆందోళనను మరింత పెంచింది. తాజా అభ్యంతరకర పోస్ట్ చేసిన యువకుడు యవత్‌లోని సహకార్ నగర్ ప్రాంతంలో నివసిస్తున్నాడు. పోస్ట్ వైరల్ అయిన తర్వాత, స్థానిక కార్యకర్తలు సహకార్ నగర్‌కు చేరుకుని అతని ఇంట్లో విధ్వంసం సృష్టించడానికి ప్రయత్నించారు. అయితే, పోలీసులు సకాలంలో జోక్యం చేసుకోవడం వల్ల ఎలాంటి పెద్ద ప్రమాదం జరగలేదు. అయినప్పటికీ, యవత్, దాని పరిసర ప్రాంతాలలో ఉద్రిక్త వాతావరణం కొనసాగుతోంది. భద్రతా బలగాలు అప్రమత్తంగా ఉంటూ, శాంతిభద్రతలను పర్యవేక్షిస్తున్నాయి..
