పీవోకేను భారత్‌లో భాగంగా చూపించిన ఆఫ్ఘన్ క్రికెట్ బోర్డు..!..పాక్ అభ్యంతరం..
పీవోకేను భారత్‌లో భాగంగా చూపించిన ఆఫ్ఘన్ క్రికెట్ బోర్డు!
పాక్ అభ్యంతరం.. విదేశాంగ శాఖకు ఫిర్యాదు?
భారత్‌-ఆఫ్ఘనిస్తాన్‌ క్రికెట్ సిరీస్‌ ప్రారంభానికి ముందే ఓ మ్యాప్‌ వివాదం హాట్‌టాపిక్‌గా మారింది. ఆఫ్ఘనిస్తాన్‌ క్రికెట్ బోర్డు (ACB) తన అధికారిక ఎక్స్‌ ఖాతాలో షేర్‌ చేసిన ఓ వీడియోలో పాక్ ఆక్రమిత కశ్మీర్‌ (PoK), గిల్గిట్‌-బాల్టిస్తాన్‌ ప్రాంతాలను భారతదేశంలో భాగంగా చూపించడం చర్చనీయాంశంగా మారింది.
సిరీస్‌ను ప్రమోట్‌ చేస్తూ ACB ఈ వీడియోను పోస్ట్‌ చేసింది. ‘‘ఘనమైన చరిత్ర, సంస్కృతి, ఉమ్మడి అభిరుచితో రెండు దేశాలను ఏకం చేసే సిరీస్‌ ఇది. ఇవి కేవలం మ్యాచ్‌లు కాదు.. స్వదేశంలోని లక్షలాది మంది ప్రజల ఆశలు, గర్వాన్ని మోసుకుంటూ ఆఫ్ఘన్ జట్టు మైదానంలోకి అడుగుపెట్టనుంది’’ అంటూ పేర్కొంది.
అయితే వీడియోలో కనిపించిన మ్యాప్‌పై పాకిస్థాన్‌ అభ్యంతరం వ్యక్తం చేసినట్లు సమాచారం. ఈ విషయాన్ని పాకిస్థాన్‌ క్రికెట్ బోర్డు (PCB) తమ విదేశాంగ శాఖ దృష్టికి తీసుకెళ్లినట్లు తెలుస్తోంది. అంతర్జాతీయ వేదికపై ఈ అంశాన్ని లేవనెత్తేందుకు ఇస్లామాబాద్‌ ప్రయత్నిస్తున్నట్లు సమాచారం. అయితే ఇప్పటివరకు ఎలాంటి అధికారిక చర్య ప్రకటించలేదు.
ఇప్పటికే తీవ్ర ఉద్రిక్తతలు
ఆఫ్ఘనిస్తాన్‌, పాకిస్థాన్‌ మధ్య సంబంధాలు ఇప్పటికే తీవ్రంగా దెబ్బతిన్నాయి. సరిహద్దు ఘర్షణలు, వైమానిక దాడులతో ఉద్రిక్తతలు కొనసాగుతున్న సమయంలో ఈ మ్యాప్‌ వివాదం మరింత కాక రేపుతోంది.
పాకిస్థాన్‌లో జరుగుతున్న దాడులకు తెహ్రిక్‌-ఎ-తాలిబన్‌ పాకిస్థాన్‌ (TTP) కారణమని ఇస్లామాబాద్‌ ఆరోపిస్తోంది. TTPకు ఆఫ్ఘన్ తాలిబన్‌ ప్రభుత్వం ఆశ్రయం కల్పిస్తోందని పాకిస్థాన్‌ పదేపదే ఆరోపిస్తున్నప్పటికీ.. ఆఫ్ఘనిస్తాన్‌ ఈ ఆరోపణలను తిరస్కరిస్తోంది.
సెప్టెంబర్‌ 13 నుంచి టీ20 సిరీస్‌
ఇదిలా ఉంటే భారత్‌, ఆఫ్ఘనిస్తాన్‌ జట్ల మధ్య మూడు మ్యాచ్‌ల టీ20 సిరీస్‌ సెప్టెంబర్‌ 13 నుంచి ప్రారంభం కానుంది. మూడు మ్యాచ్‌లూ ఢిల్లీలోని అరుణ్‌ జైట్లీ స్టేడియంలో జరగనున్నాయి.
తొలి టీ20 – సెప్టెంబర్‌ 13
రెండో టీ20 – సెప్టెంబర్‌ 15
మూడో టీ20 – సెప్టెంబర్‌ 17
క్రికెట్ సిరీస్‌కు ముందే పీవోకే మ్యాప్‌ వివాదం తెరపైకి రావడంతో.. ఈ వ్యవహారం రానున్న రోజుల్లో మరింత రాజకీయ దుమారం రేపుతుందా అన్నది ఆసక్తికరంగా మారింది.
