తెలంగాణ విద్యా వ్యవస్థలో భారీ మార్పులు.. వచ్చే ఏడాది నుంచే 10+2 విధానం అమలు..!

రాష్ట్రంలో ఇంటర్మీడియట్‌ విద్య ముగియనుంది. వచ్చే విద్యా సంవత్సరం నుంచి 11, 12 తరగతులు పాఠశాల విద్యలో భాగం కానున్నాయి. సీబీఎ్‌సఈతో పాటు దేశంలో మెజారిటీ రాష్ట్రాలు అనుసరిస్తున్న విధానానికి అనుగుణంగా రాష్ట్ర విద్యా వ్యవస్థను మార్చాలని ప్రభుత్వం నిర్ణయించింది. ఈ మేరకు 10+2 విధానాన్ని అమలు చేయాలని ముఖ్యమంత్రి రేవంత్‌ రెడ్డి అధికారులను ఆదేశించారు. ఈ విద్యా సంవత్సరం (2026-27) నుంచే అమలు చేయాలని సీఎం భావించినా, సమయం సరిపోదని అధికారులు చెప్పడంతో వాయిదా పడింది.

ఈసారి తప్పనిసరిగా అమలు చేయాల్సిందేనని బుధవారం జరిగిన సమీక్షలో సీఎం తేల్చిచెప్పారు. దీంతో ఉమ్మడి రాష్ట్రంలో పీవీ నరసింహారావు విద్యామంత్రిగా ఉన్నప్పుడు 1969-70లో మొదలైన ఇంటర్‌ విధానం దాదాపు ఆరు దశాబ్దాల తర్వాత ముగియనుంది. కొత్త విధానంలో నర్సరీ నుంచి 4వ తరగతి వరకు ప్రాథమిక విద్య, 5 నుంచి 8 వరకు సెకండరీ, 9 నుంచి 12 వరకు సీనియర్‌ సెకండరీ విద్యగా పునర్‌ వ్యవస్థీకరించాలని సీఎం ఆదేశించారు. బుధవారం ఎంసీఆర్‌హెచ్‌ఆర్డీలో విద్యాశాఖ ఉన్నతాధికారులతో ఆయన సమీక్ష నిర్వహించారు. దేశంలో 18 రాష్ట్రాల్లో 10+2 విధానమే అమల్లో ఉందని, విద్యార్థుల ప్రయోజనాల కోసమే ఈ నిర్ణయం తీసుకున్నామని చెప్పారు. విద్యాశాఖలో తాను తీసుకునే ప్రతి నిర్ణయానికి విద్యార్థే కేంద్రమని, మరే అంశానికీ తావు లేదని అన్నారు..

నూతన విద్యా సంస్కరణల్లో భాగంగా నర్సరీ నుంచి 12వ తరగతి వరకు బోధనకు ప్రత్యేక ప్రాధాన్యం ఇస్తున్నామని ముఖ్యమంత్రి(Telangana Government) తెలిపారు. ముఖ్యంగా 9వ తరగతి నుంచి 12వ తరగతి వరకు ఉన్న విద్యను ఉన్నత విద్యగా పరిగణించి, విద్యార్థులకు ప్రత్యేక నైపుణ్య శిక్షణ (Specialised Education) అందించాలని స్పష్టం చేశారు. 12వ తరగతి నుంచే విద్యార్థుల భవిష్యత్తును తీర్చిదిద్దే వృత్తి నైపుణ్యాలపై దృష్టి సారించనున్నట్లు వెల్లడించారు. ప్రైవేటు విద్యాసంస్థలకు ఏమాత్రం తీసిపోని విధంగా ప్రభుత్వ పాఠశాలలను తీర్చిదిద్దడమే తమ ప్రభుత్వ దృఢ సంకల్పమని పేర్కొన్నారు..

మౌలిక వసతుల కల్పనకు ఆదేశాలు.. సమావేశానికి హాజరైన ఉన్నతాధికారులు:
ఈ నూతన విధానాల అమలుకు అవసరమైన మౌలిక వసతులను అన్ని పాఠశాలల్లో తక్షణమే కల్పించాలని అధికారులకు సీఎం సూచించారు. ఏ ఒక్క విద్యార్థికి నష్టం జరగకుండా, సున్నితంగా ఈ మార్పులను తీసుకురావాలని ఆదేశించారు. డాక్టర్ మర్రి చెన్నారెడ్డి మానవ వనరుల అభివృద్ధి సంస్థలో జరిగిన ఈ కీలక సమావేశంలో ప్రభుత్వ సలహాదారులు కే.కేశవరావు, సుదర్శన్ రెడ్డి, ఎంపీ వేం నరేందర్ రెడ్డి, ప్రభుత్వ ప్రధాన కార్యదర్శి సంజయ్ జాజుతో పాటు పలువురు విద్యాశాఖ ఉన్నతాధికారులు పాల్గొన్నారు.