శుక్రవారం (నవంబర్ 13) చోటుచేసుకున్న ఈ సాంకేతిక సమస్యతో వేలాది మంది వినియోగదారులు ఇమెయిల్స్ పంపడం, స్వీకరించడం, ఫైళ్లను యాక్సెస్ చేయడం, ఏఐ సేవలను ఉపయోగించడంలో ఇబ్బందులు ఎదుర్కొన్నారు. మైక్రోసాఫ్ట్ 365 కనెక్టర్లపై ఆధారపడిన OpenAI, Anthropic సేవలు కూడా ప్రభావితమయ్యాయి.
సర్వర్లపై అధిక భారం.. అసలు కారణం ఇదే!
ఈ అంతరాయానికి కారణాన్ని పరిశీలించిన మైక్రోసాఫ్ట్ కీలక విషయాన్ని వెల్లడించింది. ప్రభావిత సర్వర్లలో సురక్షిత కనెక్షన్లు ఏర్పాటు చేసే ప్రక్రియలో సమస్య తలెత్తినట్లు గుర్తించింది. ఈ ప్రక్రియపై అధిక భారం పడటంతో సర్వర్లు వినియోగదారుల అభ్యర్థనలను ప్రాసెస్ చేయలేకపోయాయని తెలిపింది. అయితే, మొత్తం ట్రాఫిక్ పెరగడం వల్ల కాకుండా, ట్రాఫిక్‌ను నిర్వహించేందుకు అందుబాటులో ఉన్న సర్వర్ల సంఖ్య తగ్గడం వల్లే సమస్య ఏర్పడినట్లు స్పష్టం చేసింది. డౌన్‌డిటెక్టర్‌లో Outlook అంతరాయంపై ఫిర్యాదులు శుక్రవారం తెల్లవారుజామున 1.30 గంటల సమయంలో 1,38,058కు చేరాయి. ఉదయం 4.30 గంటల నాటికి ఈ సంఖ్య సుమారు 34,490కు తగ్గింది…
ప్రభావిత మౌలిక సదుపాయాలను పునఃప్రారంభించడంతో పాటు, కాన్ఫిగరేషన్ మార్పులను కొన్ని సర్వర్లపై పరీక్షిస్తున్నట్లు మైక్రోసాఫ్ట్ తెలిపింది. కొన్ని ప్రాంతాల్లో తాత్కాలికంగా ట్రాఫిక్ ఆంక్షలు విధించి, సర్వర్ల పనితీరును పర్యవేక్షిస్తోంది. పరిస్థితి స్థిరపడిన తర్వాత క్రమంగా ట్రాఫిక్‌ను పునరుద్ధరించే చర్యలు చేపట్టింది.
ఇదిలా ఉండగా, ఈ అంతరాయం కారణంగా అమెరికాకు చెందిన ఎలక్ట్రిక్ ట్రక్కుల తయారీ సంస్థ Workhorse Group తన మూడో త్రైమాసిక ఆర్థిక ఫలితాల ప్రకటనను నవంబర్ 12 నుంచి నవంబర్ 16కు వాయిదా వేసింది. ఇటీవల అజూర్ క్లౌడ్‌లోనూ అంతరాయం ఏర్పడిన నేపథ్యంలో వరుస సాంకేతిక సమస్యలు మైక్రోసాఫ్ట్ సేవల విశ్వసనీయతపై చర్చకు దారితీశాయి..
