ఏపీకి మరో తుఫాన్ ముప్పు.
బంగాళాఖాతంలో బలపడుతున్న అల్పపీడనం.
ఈ నెల 16న తుఫాన్‌గా బలపడనున్న వాయుగుండం
తుఫాన్‌గా మారితే అక్వాన్‌గా నామకరణం
ఈ నెల 15 నుంచి పెరగనున్న ఈదురుగాలుల తీవ్రత
తుఫాన్ గమనం ఉత్తర కోస్తా వైపు ఉండే అవకాశం ఉంది
19వ తేదీ సాయంత్రం తీరం దాటే అవకాశం ఉన్నట్లుగా వాతావరణ శాఖ హెచ్చరించారు…
బంగాళాఖాతంలో వరుసగా ఏర్పడుతున్న తుఫానుల సిరీస్‌లో మరో తీవ్ర తుఫాన్ రూపుదిద్దుకునే సూచనలు కనిపిస్తున్నాయని భారత వాతావరణ శాఖ (ఐఎమ్‌డీ) హెచ్చరించింది. అక్టోబర్ చివరి వారంలో ఏపీని తాకిన ‘అర్నాబ్’, నవంబర్ ప్రారంభంలో ప్రభావం చూపిన ‘మురసు’ తుఫానుల తర్వాత ఇప్పుడు తాజాగా ‘అక్వాన్(Cyclone Aquan)’ పేరుతో మూడో తుఫాన్ ఏర్పడే సంకేతాలు ఉన్నట్లు వెల్లడించింది. నవంబర్ 13వ తేదీ నాటికి దక్షిణ అండమాన్ సముద్రం, ఆగ్నేయ బంగాళాఖాతంలో నూతన అల్పపీడనం ఏర్పడుతుందని, అయితే ఇది పూర్తిస్థాయి తుఫానుగా మారుతుందా లేదా అనే అంశంపై నవంబర్ 15 నాటికి స్పష్టత వస్తుందని అధికారులు తెలిపారు. ఒకవేళ తుఫాను తీవ్రరూపం దాల్చితే ఇరాన్ ప్రతిపాదించిన ‘అక్వాన్’ అనే పేరును ఖరారు చేయనున్నారు…
అక్టోబర్, నవంబర్ మాసాల్లో వరుస తుఫానులు తీరప్రాంతాలపై ప్రభావం చూపడంతో, రాబోయే ఈ నూతన అల్పపీడనంపై ఆంధ్రప్రదేశ్, తమిళనాడు రాష్ట్రాల యంత్రాంగం తీవ్ర నిఘా ఉంచింది. వాతావరణ శాఖ ఇచ్చే సూచనల ఆధారంగా ముందస్తు సహాయక చర్యలను సిద్ధం చేస్తున్నారు. అల్పపీడనం తీవ్రత పెరిగితే మత్స్యకారులు సముద్రంలోకి వేటకు వెళ్లకూడదని వాతావరణ అధికారులు హెచ్చరిస్తున్నారు.
