ఇరాన్‌కు చెందిన లారక్ ద్వీపంలోని రెండు క్షిపణి ప్రయోగ కేంద్రాలపై అమెరికా సైన్యం నిన్న ఆకస్మిక దాడి చేసింది. హోర్ముజ్ జలసంధి గుండా ప్రయాణించే వాణిజ్య నౌకలను లక్ష్యంగా చేసుకుని, సముద్రపు మందుపాతరలు
(సీ మైన్స్) కలిగిన రాకెట్లను ప్రయోగించేందుకు ఇరాన్ ఐఆర్‌జీసీ (IRGC) బలగాలు సిద్ధమవుతున్నాయని యూఎస్ సెంట్రల్ కమాండ్ (CENTCOM) ప్రతినిధి టిమ్ హాకిన్స్ వెల్లడించారు.
అమెరికా చేపట్టిన ఈ మెరుపు దాడికి ప్రతీకారంగా, జోర్డాన్‌లో ఉన్న యూఎస్ సైనిక స్థావరాలను లక్ష్యంగా చేసుకుని ఇరాన్ క్షిపణి దాడులు నిర్వహించింది. ఈ విషయాన్ని ఇరానియన్ రివల్యూషనరీ గార్డ్స్ కార్ప్స్ ధ్రువీకరించింది. కాగా, సోమవారం తమ గగనతలంలోకి అక్రమంగా ప్రవేశించిన 8 క్షిపణులను విజయవంతంగా కూల్చివేసినట్లు జోర్డాన్ సైన్యం అధికారికంగా ప్రకటించింది. ఇరు దేశాలు పరస్పరం చేసుకుంటున్న ఈ దాడుల వల్ల ఆ ప్రాంతంలో తీవ్ర అశాంతి నెలకొంది…ఈ సైనిక ఘర్షణల మధ్య, అమెరికా అధ్యక్షుడు డొనాల్డ్ ట్రంప్ తన ‘ట్రూత్ సోషల్’ వేదికగా విడుదల చేసిన ఒక పోస్ట్ ప్రపంచవ్యాప్తంగా పెను ప్రకంపనలు సృష్టించింది. ఇరాన్‌కు చెందిన అత్యంత కీలకమైన ముడి చమురు టెర్మినల్ ‘ఖార్గ్ ద్వీపం’ను అమెరికా పూర్తిగా నేలమట్టం చేసిందని ఆయన పేర్కొన్నారు. అంతేకాకుండా, దీనికి సంబంధించిన ఒక యానిమేషన్ వీడియోను కూడా పంచుకున్నారు. ఆ ద్వీపం పూర్తిగా ధ్వంసమైందని అధ్యక్షుడు ట్రంప్ ప్రకటించడం అంతర్జాతీయ స్థాయిలో ఉద్రిక్తతలను మరింత పెంచింది.
ఇప్పటికే అమెరికా – ఇరాన్ మధ్య శాంతి చర్చలు స్తంభించిపోయిన నేపథ్యంలో, ప్రస్తుతం మొదలైన ఈ ప్రత్యక్ష ఘర్షణ పూర్తి స్థాయి యుద్ధానికి దారితీయవచ్చన్న ఆందోళనలు వ్యక్తమవుతున్నాయి. ప్రపంచంలోనే అత్యంత కీలకమైన సముద్ర వాణిజ్య మార్గంలో ఉద్రిక్తతలు తారస్థాయికి చేరడంతో అంతర్జాతీయ మార్కెట్లో ముడి చమురు ధరలు భారీగా పెరగడం ప్రారంభించాయి. ఈ దాడులు ప్రపంచ ఆర్థిక వ్యవస్థపై కూడా తీవ్ర ప్రతికూల ప్రభావాన్ని చూపే అవకాశం ఉన్నందున, ప్రపంచ దేశాలు ఈ పరిణామాలను అత్యంత ఆందోళనతో నిశితంగా గమనిస్తున్నాయి..
