ముగిసిన కేంద్ర కేబినెట్ సమావేశం..కీలక నిర్ణయాలు..!.
రూ.77,101 కోట్ల ప్రాజెక్టులకు ఆమోదం
రైతులకు ఎరువుల సబ్సిడీకి రూ.62,370 కోట్లు
గ్రేటర్ నోయిడా మెట్రోకు గ్రీన్ సిగ్నల్..
న్యూఢిల్లీ:ప్రధానమంత్రి నరేంద్ర మోదీ అధ్యక్షతన బుధవారం జరిగిన కేంద్ర మంత్రివర్గ సమావేశంలో పలు కీలక నిర్ణయాలు తీసుకున్నారు.మొత్తం రూ.77,101 కోట్ల విలువైన ఐదు ప్రతిపాదనలకు కేబినెట్ ఆమోదం తెలిపింది.రైతులకు ఎరువుల సబ్సిడీ,సూక్ష్మ సంస్థలకు రుణ సదుపాయాలు,మెట్రో రైలు విస్తరణ,జాతీయ మ్యూజియం నిర్మాణం వంటి అంశాలకు ప్రాధాన్యత ఇచ్చింది. సమావేశం అనంతరం కేంద్ర మంత్రి అశ్విని వైష్ణవ్ ఈ నిర్ణయాలను వెల్లడించినట్లు వార్తా కథనాలు పేర్కొన్నాయి.
*రబీ 2026-27 సీజన్‌కు ఎరువుల సబ్సిడీ*
రబీ 2026-27 సీజన్‌లో ఫాస్ఫేటిక్,పొటాషిక్ ఎరువులపై పోషక ఆధారిత సబ్సిడీ (NBS) కోసం రూ.62,370 కోట్లు కేటాయించేందుకు కేబినెట్ ఆమోదం తెలిపింది.డీఏపీ, ఎన్‌పీకేఎస్ తదితర ఎరువులు రైతులకు అందుబాటు ధరల్లో లభించేలా ఈ నిర్ణయం తీసుకుంది.
*చిన్న వ్యాపార సంస్థలకు రుణ భరోసా*
సూక్ష్మ వ్యాపార సంస్థలకు రుణాలు అందించేందుకు క్రెడిట్ గ్యారంటీ ఫండ్ కోసం రూ.5,000 కోట్లు కేటాయించనున్నారు.అలాగే స్టాండప్ ఇండియా పథకం లబ్ధిదారులకు రుణ భరోసా కల్పించేందుకు మరో రూ.4,111 కోట్ల నిధికి ఆమోదం తెలిపారు.ఈ రెండు నిధుల ద్వారా చిన్న వ్యాపారులు,పారిశ్రామికవేత్తలకు బ్యాంకు రుణాల లభ్యత పెంచడమే లక్ష్యం.
*గ్రేటర్ నోయిడా మెట్రోకు రూ.2,390 కోట్లు*
నోయిడా–గ్రేటర్ నోయిడా మధ్య మెట్రో రైలు ప్రాజెక్టు అభివృద్ధికి రూ.2,390 కోట్ల అంచనా వ్యయంతో చేపట్టనున్న ప్రతిపాదనకు కేంద్రం ఆమోదం తెలిపింది. దీంతో ఈ రెండు పట్టణాల మధ్య ప్రజా రవాణా అనుసంధానం మరింత మెరుగుపడనుంది.
*యుగే యుగీన్ భారత్ మ్యూజియంకు రూ.3,230 కోట్లు*
దేశ చరిత్ర,నాగరికత, సాంస్కృతిక వారసత్వాన్ని ప్రతిబింబించేలా న్యూఢిల్లీలోని నార్త్ బ్లాక్, సౌత్ బ్లాక్ భవనాల సముదాయంలో యుగే యుగీన్ భారత్ మ్యూజియం ఏర్పాటు చేయనున్నారు.ఈ ప్రాజెక్టు కోసం రూ.3,230 కోట్లను కేటాయించేందుకు కేబినెట్ ఆమోదం తెలిపింది.ఈ ఐదు ప్రతిపాదనల ద్వారా మొత్తం రూ.77,101 కోట్ల మేర ఆర్థిక కేటాయింపులకు కేంద్ర మంత్రివర్గం ఆమోదం తెలిపింది.రైతులు,చిన్న వ్యాపారులు,పట్టణ ప్రయాణికులు,దేశ సాంస్కృతిక వారసత్వ పరిరక్షణకు సంబంధించిన అంశాలు ఈ నిర్ణయాల్లో ఉన్నాయి..
