హైదరాబాద్‌లో ఆన్‌లైన్ డేటింగ్ యాప్‌ల ముసుగులో జరుగుతున్న మోసాలు మరోసారి వెలుగులోకి జూబ్లీహిల్స్ పబ్‌లో రూ. 29,000 బిల్లు వేసి వసూలు..!
హైదరాబాద్‌లో ఆన్‌లైన్ డేటింగ్ యాప్‌ల ముసుగులో జరుగుతున్న మోసాలు మరోసారి వెలుగులోకి వచ్చాయి. డేటింగ్ యాప్ ద్వారా పరిచయమైన ఓ యువతితో కలిసి డేట్‌కు వెళ్లిన యువకుడు, ఏకంగా రూ. 29,000 బిల్లు చెల్లించాల్సి రావడంతో దిగ్భ్రాంతికి గురయ్యాడు. ఈ ఘటన నగరంలోని జూబ్లీహిల్స్‌లో చోటుచేసుకుంది.
వివరాల్లోకి వెళ్తే, హేమంత్ అనే యువకుడికి ‘క్వాక్-క్వాక్’ అనే డేటింగ్ యాప్ ద్వారా దివ్య అనే యువతి పరిచయమైంది. వీరిద్దరూ జూబ్లీహిల్స్‌లోని ’36 కెమిస్ట్రీ’ పబ్‌లో కలుసుకున్నారు. అయితే, అక్కడ గడిపిన కొద్దిసేపటికే పబ్ యాజమాన్యం రూ. 29,000 బిల్లు వేసిందని హేమంత్ ఆరోపిస్తున్నాడు.
ఇది పక్కా ప్రణాళికతో జరిగిన హనీట్రాప్ అని, సదరు యువతి పబ్ యాజమాన్యంతో చేతులు కలిపి తనను మోసం చేసిందని హేమంత్ ఆవేదన వ్యక్తం చేశాడు. ఈ ఘటనపై బాధితుడు వెంటనే జూబ్లీహిల్స్ పోలీసులకు ఫిర్యాదు చేశాడు. హేమంత్ ఫిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు. దర్యాప్తు ప్రాథమిక దశలో ఉన్నందున పూర్తి వివరాలు వెల్లడించడానికి పోలీసులు నిరాకరించారు. ఈ ఉదంతంతో డేటింగ్ యాప్‌ల వినియోగదారుల్లో మరోసారి ఆందోళన వ్యక్తమవుతోంది.
