డ్రాగన్ మార్క్ డ్రామా.. టిబెట్ ఎయిర్‌బేస్‌లలో ఏకంగా 12 J-20 ‘స్టెల్త్’ ఫైటర్ జెట్లను మోహరింపు…
డ్రాగన్ మార్క్ డ్రామా.. బోర్డర్ దగ్గర వాతావరణం చల్లగానే ఉన్నా చైనా సైనిక వర్గాల గుండెల్లో మాత్రం ఏదో ప్లాన్ ఉడుకుతున్నట్లుంది..జింజియాంగ్, టిబెట్ ఎయిర్‌బేస్‌లలో ఏకంగా 12 J-20 ‘స్టెల్త్’ ఫైటర్ జెట్లను మోహరించిందట. పాపం రాడార్లకు చిక్కకుండా గాల్లో మాయమైపోదామని చైనా ప్లాన్ చేస్తే, ‘వాంటోర్’ అనే కమర్షియల్ శాటిలైట్ వచ్చి ఫోటోలు తీసి రచ్చ రచ్చ చేసింది. పాపం చైనా… “దాక్కుందాం అనుకుంటే, కెమెరా ముందు నిలబెట్టేశారేంటిరా నాయనా!” అని లోలోపల లబోదిబోమంటుందేమో!..
వాస్తవ నియంత్రణ రేఖ (LAC) సమీపంలోని రెండు వైమానిక స్థావరాలలో చైనా కనీసం 12 అధునాతన జె-20 స్టెల్త్ ఫైటర్ జెట్లను మోహరించిందని వాణిజ్య ఉపగ్రహ చిత్రాలు సూచిస్తున్నాయి . ఇది భారత సరిహద్దుకు సమీపంలో ఐదవ తరం విమానాలు గణనీయంగా కేంద్రీకృతమై ఉన్నాయని ప్రతిబింబిస్తోంది.
ఒక ప్రైవేట్ ఉపగ్రహ సంస్థ తీసిన ఈ చిత్రాలలో, పీపుల్స్ లిబరేషన్ ఆర్మీ ఎయిర్ ఫోర్స్ (PLAAF) జిన్‌జియాంగ్‌లోని హోటాన్ ఎయిర్‌బేస్ మరియు టిబెట్‌లోని డామ్‌క్సుంగ్ ఎయిర్‌బేస్‌లో జెట్లను మోహరిస్తున్నట్లు కనిపిస్తోంది ..
రాడార్‌కు చిక్కవు సరే… కెమెరాకు దొరికితే ఎలా?
ఈ J-20 విమానాల గురించి చైనా ఇచ్చే బిల్డప్ మామూలుగా ఉండదు. “ఇది ఐదో తరం అద్భుతం, రాడార్లకు అసలు కనపడదు, గాల్లోనే మాయమైపోతుంది” అని గొప్పులు చెప్పుకుంటుంది. కానీ లద్దాక్ బార్డర్‌కు కేవలం 245 కిలోమీటర్ల దూరంలో ఇన్ని విమానాలను తెచ్చి లైన్‌లో పెట్టేసరికి అంతరిక్షంలో తిరిగే మామూలు శాటిలైట్లు కూడా “హై చైనా బొమ్మలు చూశారా!” అంటూ క్లిక్ అనిపించేశాయి. రాడార్ కళ్ళు గప్పి రావాలనుకున్న చైనా స్టీల్త్ టెక్నాలజీ, ఇప్పుడు ఆన్‌లైన్ వెబ్‌సైట్లలో కవర్ పేజీ ఫోటోగా మారి నవ్వులపాలవుతోంది..
రెచ్చగొట్టే ధోరణి..
చైనా ప్రతిసారీ ఇలాంటి చిన్న చిన్న జిమ్మిక్కులు చేయడం అలవాటే. బోర్డర్ దగ్గర నాలుగు టెంట్లు వేయడం, కొన్ని జెట్లను తెచ్చి రన్‌వే మీద నిలబెట్టడం… భారత్ స్పందన ఏంటో చూద్దామని ఎదురుచూడటం.. కానీ మన భారత్ కూడా ఏమీ తక్కువ తినలేదు. చైనా అక్కడ ఎయిర్‌బేస్‌లు ఆధునీకరిస్తుంటే భారత్ లద్దాక్, అరుణాచల్ ప్రదేశ్‌లలో రఫేల్స్, అత్యాధునిక క్షిపణి వ్యవస్థలు, రాడార్ నెట్‌వర్క్‌లతో ‘రండి చూసుకుందాం’ అన్నట్లుగా సిద్ధంగానే ఉంది.
ఆసక్తికరమైన విషయం ఏంటంటే.. ఈ 12 జెట్ల మోహరింపు నిజంగా యుద్ధ సన్నాహమా? లేక “మా దగ్గర కూడా ఖరీదైన బొమ్మలున్నాయి” అని చూపించుకోవడానికి చైనా చేసిన చిన్న పాటి పబ్లిసిటీ స్టంటా? అనేదానిపై చైనా ప్రభుత్వం ఇప్పటివరకు నోరు విప్పలేదు. ఇటు భారత వైమానిక దళం కూడా దీనిపై పెద్దగా కంగారుపడకుండా సైలెంట్‌గా సీరియస్‌గా వాచ్ చేస్తోంది.
