నటి సోనాక్షి సిన్హా మార్ఫింగ్ ఫోటోల కేసులో ఢిల్లీలో అరెస్టయిన ఆర్యన్ దీపక్ జైన్ను ముంబై కోర్టు విడుదల..!
నటి సోనాక్షి సిన్హా మార్ఫింగ్ ఫోటోల కేసులో ఢిల్లీలో అరెస్టయిన ఆర్యన్ దీపక్ జైన్ను ముంబై కోర్టు విడుదల చేసింది. సరైన అరెస్ట్ నిబంధనలు, బీఎన్ఎస్ఎస్ (BNSS) చట్ట నిబంధనలను పోలీసులు పాటించకపోవడంతో ఈ అరెస్ట్ అక్రమమని మేజిస్ట్రేట్ స్పష్టం చేసింది. సోనాక్షి సిన్హా ఫిర్యాదు మేరకు ముంబైలోని బాంద్రా పోలీస్ స్టేషన్లో కేసు నమోదు కాగా, పోలీసులు ఢిల్లీలోని షహద్రా ప్రాంతంలో ఆర్యన్ దీపక్ జైన్ను అదుపులోకి తీసుకుని ముంబైకి తీసుకువచ్చారు..అయితే, నిందితుడిని ముంబైకి తీసుకువచ్చే ముందు ఢిల్లీలోని స్థానిక మేజిస్ట్రేట్ ముందు హాజరుపర్చడంలో పోలీసులు విఫలమయ్యారని కోర్టు గుర్తించింది. ఏడు సంవత్సరాల వరకు శిక్ష పడే అవకాశం ఉన్న కేసుల్లో బీఎన్ఎస్ఎస్ సెక్షన్ 35(1)(b) ప్రకారం తప్పనిసరిగా పాటించాల్సిన నిబంధనలను, అరెస్ట్ కారాణన్ని నమోదు చేయడంలో దర్యాప్తు అధికారులు విఫలమయ్యారని న్యాయస్థానం పేర్కొంది. కేవలం దర్యాప్తు అవసరం అనే సాకుతో చట్టపరమైన రక్షణలను విస్మరించి ఎవరినీ నిర్బంధించలేమని తేల్చిచెప్పిన మేజిస్ట్రేట్, నిందితుడిని తక్షణమే విడుదల చేయాలని ఉత్తర్వులు జారీ చేశారు…
ఆర్యన్ దీపక్ జైన్గా గుర్తించబడిన నిందితుడిని ఈరోజు ఉదయం సుమారు 10.11 గంటలకు ఢిల్లీలోని షాదారా ప్రాంతంలోని జగత్పురి పోలీస్ స్టేషన్లో అరెస్టు చేశారు. అనంతరం అతడిని ముంబైకి తీసుకువచ్చి బాంద్రా కోర్టులో మేజిస్ట్రేట్ ముందు హాజరుపరిచారు.
అయితే, అతడిని ఢిల్లీ నుంచి ముంబైకి తీసుకువచ్చేటప్పుడు పోలీసులు తప్పనిసరి చట్టపరమైన ప్రక్రియను పాటించడంలో విఫలమయ్యారని గమనించిన మేజిస్ట్రేట్, అతని విడుదలకు ఆదేశించారు..