రూ.300 కూలీ పని కోసం వెళితే అదృష్టం వరించింది. జాక్‌పాట్ కొట్టి ఏకంగా లక్షాధికారి అయ్యాడు.. అతడి జీవితమే మారిపోయింది. కర్నూలు జిల్లాలో జరిగిన ఈ ఎపిసోడ్ చర్చనీయాంశంగా మారింది…ఏపీలో వర్షాలు కురుస్తున్నాయి.. ఈ క్రమంలో రతనాల సీమగా పిలిచే రాయలసీమలో వజ్రాల వేట కొనసాగుతోంది. ముఖ్యంగా కర్నూలు జిల్లాలో ఈ వజ్రాల కోసం గాలిస్తుంటారు.. స్థానికులు మాత్రమే కాదు, ఇతర ప్రాంతాలు, ఇతర రాష్ట్రాల నుంచి కూడా వజ్రాల కోసం వస్తున్నారు. ఒక్క వజ్రం దొరికితే చాలు జీవితం మారిపోతుందని భావిస్తున్నారు. తాజాగా అదే జరిగింది.. కూలీని అదృష్టం వరించింది.
కర్నూలు జిల్లా తుగ్గలి మండలం జొన్నగిరికి వ్యక్తి కూలి పనులకు వెళ్లాడు. ఓ రైతు పొలంలో వ్యవసాయ పనులు చేస్తున్న సమయంలో.. ఆ వ్యక్తికి విలువైన వజ్రం దొరికింది. ఆ వ్యక్తి మట్టి పనులు చేస్తుండగా పొలంలో ఓ రాయిలా మెరుస్తూ కనిపించింది. మనోడు అది రంగు రాయి అనుకున్నాడు.. ఎందుకైనా మంచిదని బయటకు తీసి చూశాడు. అసలే ఆ ప్రాంతంలో వజ్రాలు దొరుకుతాయి కాబట్టి దానిని జేబులో వేసుకున్నాడు. ఆ తర్వాత పనులు ముగించుకుని స్థానికంగా ఉన్న ఓ వజ్రాల వ్యాపారి దగ్గరకు తీసుకెళ్లి చూపించాడు. అప్పుడు అది రాయి కాదు విలువైన వజ్రం అని తేలింది.. ఖరీదైన ఆ వజ్రాన్ని ఆ వ్యాపారి ఏకంగా రూ.40 లక్షలకు కొనుగోలు చేసినట్లు తెలుస్తోంది. అయితే ఆ వ్యక్తి ఎవరు కొనుగోలు చేసిన వ్యాపారి ఎవరనేది క్లారిటీ లేదు.
కర్నూలు జిల్లాలో వర్షాకాలం వచ్చిందంటే చాలు చాలామంది వజ్రాల కోసం ఈ ప్రాంతానికి వస్తుంటారు. వజ్రాల వేట కొనసాగుతూనే ఉంటుంది. ఈ ఏడాది వర్షాలు ముందే మొదలుకాగా.. ఈ సీజన్‌లో రైతులు, కూలీలకు వజ్రాలు బాగానే దొరికాయి.. వెంటనే వాటిని వ్యాపారులకు అమ్మేస్తున్నారు. అనంతపురం జిల్లాలోని వజ్రకరూర్, కర్నూలు జిల్లాలోని జొన్నగిరి ప్రాంతాల్లో వర్షాకాలంలో వజ్రాల వేట జరుగుతుంది. జూన్ నుంచి సెప్టెంబర్ వరకు రైతుల కంటే వజ్రాలు వెతికేవాళ్లే ఎక్కువగా ఉంటారు. ఇక్కడ ప్రతి ఏటా 40 నుంచి 50 వజ్రాలు దొరుకుతాయని స్థానికులు చెబుతున్నారు.
ఒక్క వజ్రం దొరికితే లక్షాధికారులు అవుతామని చాలా మంది ఆశతో ఉన్నారు. అందుకే వాళ్లు పొలాల వెంట వజ్రాల కోసం వెతుకుతున్నారు. తెల్లవారుజాము నుండి చీకటి పడే వరకు వెతుకుతూనే ఉంటారు. వర్షాలు పడినప్పుడు వజ్రాలు ఎక్కువగా దొరుకుతాయని నమ్ముతారు. అందుకే ఆ సమయంలో చాలా మంది వస్తారు. వజ్రం దొరికిన విషయం ఎవరూ బయటకు చెప్పరు. దొరికిన రాళ్లను అక్కడే ఒక ముఠా తనిఖీ చేస్తుంది. వ్యాపారులు వాటిని కొనుగోలు చేస్తారు.
