ఏపీ హైకోర్టులో వైసీపీ పిటిషన్‌పై విచారణ.
నామినేషన్ల గడువు పెంచాలని వైసీపీ పిటిషన్
అరెస్ట్ చేసిన వైసీపీ నేతలను విడుదల చేయాలని పిటిషన్..
నామినేషన్ల ప్రక్రియ ముగిసిందని తెలిపిన SEC
తదుపరి విచారణ సోమవారానికి వాయిదా..
రాష్ట్రంలో ఎంపీటీసీ, జడ్పీటీసీ ఎన్నికల ప్రక్రియ ప్రారంభమైన వేళ రాజకీయ వాతావరణం ఒక్కసారిగా వేడెక్కింది. నామినేషన్ల ఘట్టంలో రాష్ట్ర వ్యాప్తంగా పలు చోట్ల తీవ్ర అవాంఛనీయ ఘటనలు జరుగుతున్నాయంటూ అధికార వర్గాలపై, ప్రతిపక్ష టిడిపిపై వైఎస్సార్ కాంగ్రెస్ పార్టీ తీవ్ర ఆగ్రహం వ్యక్తం చేసింది. ఈ నేపథ్యంలో అత్యవసర జోక్యం కోరుతూ ఏపీ హైకోర్టులో వైసీపీ ఎమ్మెల్సీ అప్పిరెడ్డి లంచ్ మోషన్ పిటిషన్ దాఖలు చేశారు…
“తన పిటిషన్‌లో వైసీపీ ప్రధానంగా అధికార యంత్రాంగం, కూటమి నేతల వైఖరిని ఎండగట్టింది. రాష్ట్రవ్యాప్తంగా అనేక ప్రాంతాల్లో తమ పార్టీకి చెందిన అభ్యర్థులను పోలీసులు అక్రమంగా అరెస్టులు చేస్తున్నారని, మరెంతో మందిని గృహనిర్బంధంలో ఉంచుతున్నారని హైకోర్టు దృష్టికి తీసుకెళ్లింది. అరెస్టు చేసిన వారందరినీ వెంటనే విడుదల చేయడంతో పాటు, అభ్యర్థులు ధైర్యంగా నామినేషన్లు వేసేలా తగిన భద్రత కల్పించాలని కోరింది.”తెలుగుదేశం పార్టీ శ్రేణులు ఉద్దేశపూర్వకంగా నామినేషన్ కేంద్రాల వద్ద దాడులకు పాల్పడుతున్నాయని వైసీపీ ఆరోపించింది. తమ అభ్యర్థులను అడ్డుకోవడమే కాకుండా, చేతిలో ఉన్న నామినేషన్ పత్రాలను లాక్కొని చించివేస్తున్నారని, ఈ హింసకు పాల్పడుతున్న వారిపై వెంటనే కేసులు నమోదు చేయాలని పిటిషన్‌లో స్పష్టం చేసింది. అంతేకాకుండా, గొడవల వల్ల నామినేషన్లు వేయలేకపోయిన వారికి అవకాశం కల్పిస్తూ నామినేషన్ల గడువును కనీసం 48 గంటల పాటు పొడిగించాలని విజ్ఞప్తి చేసింది. అలాగే అన్ని జిల్లా కేంద్రాలు, కలెక్టరేట్లలో కూడా నామినేషన్లు స్వీకరించేలా ప్రత్యేక ఏర్పాట్లు చేయాలని అడిగింది..
