ఏపీ తీరం వైపు దూసుకొస్తున్న అల్పపీడనం
అక్టోబర్ 31 నాటికి వాయుగుండంగా మారే అవకాశం..
నవంబర్ 2 నాటికి ఏపీ తీరం వైపు తుఫాన్
దక్షిణ అండమాన్ సముద్రంలో కొనసాగుతున్న అల్పపీడనం..
ఐఎండీ హెచ్చరికలతో ఏపీ తీర ప్రాంతాల్లో అప్రమత్తత.
ఛత్తీస్‌గఢ్-ఒడిశా మధ్య బలహీనపడుతున్న అర్నబ్ తుఫాన్..
సాయంత్రానికి సాధారణ అల్పపీడనంగా మారే అవకాశం.
బంగాళాఖాతంలో వరుసగా ఏర్పడుతున్న అల్పపీడనాలు, తుఫానులతో కోనసీమ తీరప్రాంత ప్రజల్లో ఆందోళన పెరుగుతోంది…ఇప్పటికే ‘అర్నబ్’ ప్రభావం నుంచి పూర్తిగా కోలుకోకముందే మరో వాయుగుండం ముప్పు పొంచి ఉందన్న వార్తలు కలవరపెడుతున్నాయి. దక్షిణ అండమాన్ సముద్రంలో ఏర్పడిన అల్పపీడనం క్రమంగా బలపడుతూ తీరం వైపు కదులుతున్నట్లు వాతావరణ శాఖ అంచనా వేస్తోంది. ఈ వాతావరణ వ్యవస్థ ప్రభావంతో గోదావరి జిల్లాల్లో మరోసారి భారీ వర్షాలు, ఈదురుగాలులు సంభవించే అవకాశం ఉందన్న హెచ్చరికలు స్థానికులను అప్రమత్తం చేస్తున్నాయి.
బలపడుతున్న అల్పపీడనం
భారత వాతావరణ శాఖ వెల్లడించిన వివరాల ప్రకారం.. ప్రస్తుతం దక్షిణ అండమాన్ సముద్ర పరిసరాల్లో అల్పపీడనం కొనసాగుతోంది. రానున్న గంటల్లో ఇది మరింత బలపడి తీవ్ర అల్పపీడనంగా మారే అవకాశం ఉంది. అండమాన్-నికోబార్ దీవుల పరిసరాల్లో కేంద్రీకృతమయ్యే ఈ వ్యవస్థ.. పశ్చిమ-వాయువ్య దిశగా కదులుతుందని అంచనా వేస్తున్నారు. అక్టోబర్ 30 నాటికి ఆగ్నేయ బంగాళాఖాతం పరిసరాల్లో వాయుగుండంగా మారే అవకాశం ఉందని అధికారులు భావిస్తున్నారు. ఈ వ్యవస్థ కదలికలు, తీవ్రతను బట్టి తదుపరి వాతావరణ పరిస్థితులపై స్పష్టత రానుంది.
అర్నబ్ బాటలోనే పయనం?
కొత్తగా ఏర్పడుతున్న వాతావరణ వ్యవస్థ ఎటువైపు పయనిస్తుందన్నది ఇప్పుడు కీలకంగా మారింది. గతంలో ‘అర్నబ్’ తుఫాను ప్రయాణించిన మార్గంలోనే ఈ వ్యవస్థ కూడా కదిలే అవకాశం ఉందన్న అంచనాలు ఆందోళన కలిగిస్తున్నాయి. అదే జరిగితే గోదావరి జిల్లాలపై ప్రభావం పడే అవకాశముందని భావిస్తున్నారు. ముఖ్యంగా తీరప్రాంతంలో ఉన్న కోనసీమకు ముప్పు పెరిగే అవకాశం ఉందన్న చర్చ సాగుతోంది. అయితే కొత్త వ్యవస్థ తుది గమనం, తీరం దాటే ప్రాంతం, ప్రభావం ఎంతవరకు ఉంటాయన్నది ఇంకా స్పష్టంగా తేలాల్సి ఉంది. తాజా వాతావరణ బులెటిన్ల ఆధారంగానే పరిస్థితిని అంచనా వేయాల్సి ఉంటుంది.
